ආමි එකේලු - කැන්ඩිලු
කවුද මේ අසේල?
ඊයේ පිට පිට දෙවැනි වරටත් ඕස්ට්‍රේලියාවට එරෙහිව ශ්‍රී ලංකාව විස්සයි20 ක්‍රිකට් තරගය ජයගත් පසු එම ජයග්‍රහණ දෙකම පසුපසින් සිටි අසේල ගුණරත්න නමැති අලුත් ක්‍රීඩකයා ගැන රටේම අවධානය යොමු විය. වයස 31 ක් වන ඔහු මෙපමණ කල් කොහේ සිටියාද යන්න
බොහෝ අය තුළ පැන නැගුණ ගැටලුවකි.
1986 ජනවාරි මස 8 වැනි දින උපත ලැබූ දොවුන්දෙගෙදර අසේල සම්පත් ගුණරත්න මහනුවර ගම් පළාත කරගත් අයෙකි. ඔහු අධ්‍යාපනය ලැබුවේ මහනුවර ශ්‍රී රාහුල විද්‍යාලයේය. පාසල් අධ්‍යාපනයෙන් අනතුරුව, ඔහු ශ්‍රී ලංකා යුද හමුදා සේවයට ගියේය.
6 වැනි ක්ෂේත්‍ර රෙජිමේන්තුවේ ඔහු සේවය කර තිබුනේ කාලතුවක්කු නිලධාරියෙකු ලෙසිනි.
පන්දු පලන්නට සමත් ප්‍රහාරකයෙකු ලෙස ඔහු යුද හමුදා පිලේ ප්‍රසිද්ධියට පත්වූවෙකි. වසර ගණනාවක් පුරා ශ්‍රී ලංකා යුද හමුදා ක්‍රිකට් පිලට බොහෝ ජයග්‍රහණ ඔහු නිසා ලැබිණි
මග්ගොන බදුරලිය ක්‍රීඩා සමාජයට එරෙහිව ඔහු සිය මංගල ද්විත්ව ශතකයද ලබා ගත්තේ ඒ කාලයේය. පන්දු 170 කදී ලබාගත් එම ද්විත්ව ශතකයට හතරේ පහර 22 ක් හා හයේ පහර 5 ක් ඇතුළත් විය.
කෙසේ නමුත් ඔහුගේ වයස අවුරුදු 30 වනතුරු ශ්‍රී ලංකා කණ්ඩායමේ ස්ථානයක් ලබාගන්නට අවස්ථාවක් ලැබුනේ නැත.
ඔහු මීට වසරකට පෙර 2016 පෙබරවාරියේ ශ්‍රී ලංකාව හා ඉන්දියාව අතර විස්සයි20 තරගයකට මුල්වරට තොරා ගත් අවස්ථාවේ රැස් කළ හැකිවූයේ ලකුණු 4 කි. ඕවර 2 යි පන්දු 5 ක් යවා ලකුණු 22 ක් දුන්නත් කඩුළු ලබාගත්තේ නැත.
ඔහු නැවත ටෙස්ට් තරග හා එක්දින තරග සඳහා තෝරාගන්නේ 2016 ඔක්තෝබර් නොවැම්බර් මාසවලදීය.
කෙසේ නමුත් අසේල ගුණරත්න සිම්බාව්වේ ටෙස්ට් හා එක්දින තරගාවලියේත් ශ්‍රී ලංකා ප්‍රිමියර් ලීග් තරගාවලියේත් ඉදිරියෙන්ම සිටි පිතිකරුවෙකි.
මොහුට දකුණු අප්‍රිකාවේ ටෙස්ට් අවස්ථාව දීමට කණ්ඩායම තෝරන නිලධාරීනට නැණ නුවණ පහළ වුවානම් එම ටෙස්ට් තරගාවලියේ ප්‍රතිඵලයන් ද මීට වඩා වෙනස්වීමට ඉඩ තිබුණ බව විචාරකයින් සඳහන් කර තිබේ.
අසේලගේ දක්ෂතා සටහන පහත පරිදිය.
