මහරගම පොලීසිය විසින් වාර්තා කරන පරිදි, මහරගම අපේක්ෂා රෝහල අසල පිහිටි විහාරස්ථානයක පින් පෙට්ටියක් සොරකම් කිරීම සම්බන්ධයෙන් එම රෝහලේ කනිෂ්ඨ සේවකයෙකු අත්අඩංගුවට ගෙන තිබේ. පොලීසිය සඳහන් කරන්නේ අත්අඩංගුවට ගෙන ඇත්තේ බකමූණ ප්‍රදේශයේ පදිංචි වයස අවුරුදු 37ක් වන මහරගම අපේක්ෂා රෝහලේ සේවය කරන සෞඛ්‍ය කාර්ය සහායකයෙකු බවයි.

සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා විසින් ඊයේ (21) කොළඹදී පැවති කැබිනට් තීරණ දැනුම්දීමේ මාධ්‍ය හමුවේදී සංවේදී හෙළිදරව්වක් සිදු කරන ලදී. ඒ අනුව, රුපියල් 370ක සාමාන්‍ය මිලක් සහිත හෘද රෝග ඖෂධයක් රුපියල් 70,000කට වැඩි මුදලකට මිලදී ගැනීමට එක් සමාගමකට ලබා දී ඇති අවසරය පිළිබඳව පූර්ණ පරීක්ෂණයක් සිදු කරන බව ප්‍රකාශ කළේය.

සියඹලාණ්ඩුව මුතුකණ්ඩිය ප්‍රදේශයේ පදිංචි පාසල් සිසුවියක් වන වයස අවුරුදු 15 මාස 02ක් වූ දැරියකට ලිංගික අතවර කිරීමේ චෝදනාව යටතේ උපකාරක පන්ති ගුරුවරයෙකු 19 දින අත්අඩංගුවට ගෙන තිබේ. සැකකරු පසුගිය දින කිහිපය තිස්සේ පොලිසිය මගහරිමින් සිටි අතර, ඔහු නීතිඥවරයෙකු සමඟ පොලිසියට භාර වූ අවස්ථාවේ අත්අඩංගුවට ගැනීම සිදු කර ඇත.

නව ජනාධිපති ඩොනල්ඩ් ට්‍රම්ප් මහතා ඊයේ (22) දින සිය ධුර ප්‍රතිඥාව දීමෙන් පසු පැවැති මාධ්‍ය හමුවකදී ප්‍රකාශ කළේ චීන භාණ්ඩ සඳහා 10%ක තීරුබදු පැනවීමට සැලසුම් කරන බවයි. මෙම තීරුබදු පැනවීම පෙබරවාරි 1 වන දින සිට ක්‍රියාත්මක කිරීමට අපේක්ෂා කරන බව ද ඔහු සඳහන් කළේය.

 මහජන ආරක්ෂක නියෝජ්‍ය අමාත්‍ය නීතිඥ සුනිල් වටගල මහතා ඊයේ මාධ්‍ය ඉදිරියේ ප්‍රකාශ කළේ ජාතික ජනබල වේගයේ සියලුම පාර්ලිමේන්තු මන්ත්‍රීවරුන් වැටුප් හ‍ා දීමනා නොලබා වැඩ කිරීමට තීරණය කර ඇති බවයි. සියලුම මන්ත්‍රීවරුන්ගේ සහ අමාත්‍යවරුන්ගේ හා ජනපති අගමැතිගේ වැටුප් හා දීමනා බොරැල්ල ප්‍රදේශයේ පිහිටි මහජන බැංකුවේ විශේෂ ගිණුමකට බැර කරන බවයි. පක්ෂයේ ප්‍රතිපත්ති අනුව පුද්ගලික පරිහරණයට නොගෙන මෙම මුදල් සම්පූර්ණයෙන්ම මහජන සුභසිද්ධිය වෙනුවෙන් යොදවන බව ද ඔහු අවධාරණය කළේය.

විද්‍යා හා තාක්ෂණ අමාත්‍ය ක්‍රිෂාන්ත අබේසේන මහතාගේ නම ඉදිරියෙන් සඳහන්ව තිබූ මහාචාර්ය පදවි නාමය ඊයේ (21) දින පාර්ලිමේන්තු වෙබ් අඩවියෙන් ඉවත් කරන ලදී. මෙම ඉවත් කිරීම සිදු කර ඇත්තේ අමාත්‍යවරයාගේ පුද්ගලික ඉල්ලීමක් මත බව පාර්ලිමේන්තු ආරංචි මාර්ග තහවුරු කරයි.

 

රාජතාන්ත්‍රික කටයුතු සඳහා ජනාධිපති මන්දිර දෙකක් පමණක් පවත්වාගෙන යන බව කැබිනට් ප්‍රකාශක අමාත්‍ය නලින්ද ජයතිස්ස මහතාා පැවසීය. කොළඹ සහ මහනුවර ජනාධිපති මන්දිර පමණක් ඉහත කටයුතු වෙනුවෙන් පවත්වා ගෙන යන බව කී අමාත්‍යවරයා සෙසු ජනාධිපති මන්දිර වෙනත් ප්‍රයෝජනවත් කටයුතු වෙනුවෙන් යොදා ගන්නා බව සඳහන් කළේය.

කැබිනට් මාධ්‍ය ප්‍රකාශක වෛද්‍ය නාලින්ද ජයතිස්ස මහතා අද පැවසුවේ හිටපු ජනාධිපති මහින්ද රාජපක්ෂ මහතා ඉවත් වන ලෙස දැනුම් දීමට පෙර නිල නිවසින් ඉවත් වීම වඩාත් සුදුසු බවයි. ජනාධිපතිවරුන්ගේ හිමිකම් පනතේ විධිවිධාන පිළිබඳව අවබෝධයක් තිබේ නම්, එසේ කළ යුතු බව ජයතිස්ස අමාත්‍යවරයා පෙන්වා දුන්නේය.

තුර්කියේ ඉස්තාන්බූල් නගරයෙන් කිලෝමීටර් 300ක් පමණ නැගෙනහිරින් පිහිටි බොලු පළාතේ කොරොග්ලු කඳුකරයේ කර්තල්කායා ප්‍රදේශයේ ග්‍රෑන්ඩ් කර්තල් හෝටලයේ ඇති වූ භයානක ගින්නෙන් පුද්ගලයින් 66 දෙනෙකු මියගොස් තවත් 51 දෙනෙකු තුවාල ලැබූ බව තුර්කි අභ්‍යන්තර අමාත්‍ය අලී යෙර්ලිකායා මහතා නිල වශයෙන් ප්‍රකාශ කර සිටියේය.

අනුරාධපුර මහේස්ත්‍රාත් අධිකරණය විසින් පාර්ලිමේන්තු මන්ත්‍රී, වෛද්‍ය රාමනාදන් අර්ජුනා මහතා අත්අඩංගුවට ගැනීමට නියෝග කර තිබේ. මෙම නියෝගය නිකුත් කර ඇත්තේ ඊයේ (ජනවාරි 20) රාත්‍රියේ සිදුවූ සිද්ධියක් සම්බන්ධයෙන් අද (ජනවාරි 21) දින අධිකරණයට ඉදිරිපත් කරන ලද කරුණු සැලකිල්ලට ගනිමිනි.

කොළඹ ප්‍රධාන මහේස්ත්‍රාත් තනුජා ලක්මාලි මහත්මියගේ නියෝගය පරිදි, බණ්ඩාරවෙල ප්‍රදේශයේ ප්‍රසිද්ධ පාසලක විදුහල්පතිවරයෙකු 2025 ජනවාරි 31 වන දින දක්වා රිමාන්ඩ් භාරයට පත් කෙරිණි. මෙම තීරණය ගනු ලැබුවේ පළමු වසරට දරුවෙකු ඇතුළත් කර ගැනීම වෙනුවෙන් වැලි කියුබ් එකක් සහ සිමෙන්ති කොට්ට දහයක වටිනාකමට සමාන රුපියල් 18,500ක මුදලක් අල්ලසක් ලෙස ලබා ගැනීමේ චෝදනාව මතය.

හිටපු ජනාධිපති මහින්ද රාජපක්ෂ මහතා කොළඹ විජේරාම මාවතේ පිහිටි තම නිල නිවසින් ඕනෑම මොහොතක ඉවත් වීමට සූදානම් බව ප්‍රකාශ කර සිටී. ජනාධිපති අනුර කුමාර දිසානායක මහතා විසින් මෑතකදී කරන ලද ප්‍රකාශයකට ප්‍රතිචාර දක්වමින් ඊයේ (20) දින ඒ මහතා මෙම ප්‍රකාශය සිදු කළේය.

ඕස්ට්‍රෙලියානු ක්‍රිකට් ක්‍රීඩක සෑම් කොන්ස්ටාස් රසවත් සිද්ධියක් අන්තර්ජාලය තුළ ආන්දෝලනයක් ඇති කර තිබෙනවා. මේක වුණේ මෙහෙමයි - කොන්ස්ටාස් පුහුණුවීම් සඳහා ක්‍රිකට් මධ්‍යස්ථානයට ගිය වෙලාවේ එයාගේ රසිකයෙක් එයාව දැක්කා. ඒ රසිකයා එයාගේ වාහනයෙන් බැහැලා කොන්ස්ටාස්ව හම්බවෙන්න දිව්වා. හැබැයි එයා අමතක කළා වාහනේ හෑන්ඩ් බ්‍රේක් එක දාන්න!

ජාතික හැඳුනුම්පත් ඩිජිටල්කරණ ව්‍යාපෘතිය යටතේ පුරවැසියන්ගේ ජෛවමිතික දත්ත රැස්කිරීමේ අරමුණ පිළිබඳව රජය පැහැදිලි කිරීමක් කළ යුතු බවට ජන අරගල ව්‍යාපාරයේ ක්‍රියාකාරී වසන්ත මුදලිගේ මහතා අවධාරණය කර සිටී. ඉන්දියානු සමාගමක් වෙත පැවරීමට නියමිත මෙම ව්‍යාපෘතිය යටතේ පුරවැසියන්ගේ ඇසේ කළු ඉංගිරියාව, ඇඟිලි සලකුණු, මුහුණේ හැඩය, කන් සහ නාසයේ හැඩය වැනි පුද්ගල ජෛවමිතික දත්ත රැස්කිරීමට සැලසුම් කර ඇති බව ඔහු පෙන්වා දෙයි.

ශ්‍රී ලංකාවේ රෝහල් උපස්ථායක සේවක සේවිකාවන් දීර්ඝ කාලයක් තිස්සේ හඳුන්වනු ලැබූ උපස්ථායක (Attendant) නාමය ඊයේ වෙනස් විය. සෞඛ්‍ය සේවා අධ්‍යක්ෂ ජනරාල්වරයාගේ නිල අනුමැතිය යටතේ ඔවුන්ගේ වෘත්තීය නාමය 'සාත්තු සේවක' (Caregiver) ලෙස නම් කෙරිණි.

බ්‍රිතාන්‍ය රජ පවුලේ කනගාටුදායක වාර්තාවක් අනාවරණය වෙමින් පවතී. චාල්ස් රජුගේ සෞඛ්‍ය තත්ත්වය දිනෙන් දින පිරිහෙමින් පවතින බවට රාජකීය ආරංචි මාර්ග උපුටමින් බ්‍රිතාන්‍යයේ පළවන ග්ලෝබ් පුවත්පත හෙළි කරයි. මේ හේතුවෙන් ඔහු තම පුත් විලියම් කුමරු වෙත රාජ්‍ය වගකීම් භාර දීමට සූදානම් වන බවද වාර්තා කර තිබේ.

පන්විල පොලිස් වසමේ හුළුගඟ බැද්දේගම මාර්ගයේ සිදුවූ දරුණු රිය අනතුරක් හේතුවෙන් මොරගහ ඔයට වැටී අතුරුදන්ව සිටි ජීප් රථයේ රියැදුරුගේ මළ සිරුර ජනවාරි 20 වන දින පෙරවරුවේදී හමු වී ඇත. මෙම අනතුරින් විශ්‍රාමික විදුහල්පතිවරයෙකු සහ ඔහුගේ බිරිඳ ද ජීවිතක්ෂයට පත්ව ඇති අතර, තවත් පුද්ගලයන් දෙදෙනෙකු බරපතල තුවාල ලබා ඇත.

ශ්‍රී ලන්කන් ගුවන් සේවය විසින් 2013 වසරේදී සිදු කරන ලද එයාර්බස් ගුවන් යානා මිලදී ගැනීමේ ගනුදෙනුවට අදාළ දූෂණ චෝදනා සම්බන්ධයෙන් ගොනු කර ඇති නඩුවේ රහස් සාක්ෂිකරුවෙකු ඊයේ (20) දින කොටුව මහේස්ත්‍රාත් අධිකරණයේදී සිය සාක්ෂි ලබා දුන්නේය.

විෂ්ණු වරදන් අධ්‍යක්ෂණය කළ නවතම චිත්‍රපටය වන "නෙසිප්පයා" මේ වනවිට ශ්‍රී ලංකාවේ තිරගත වන්නකි. 2025 තිරගතවන නවතම නිර්මාණයක් වන නමුත් ඒ ගැන ප්‍රතිචාර දුර්වලය. ප්‍රේක්ෂකයන්ගේ බලාපොරොත්තු සපුරාලීමට අපොහොසත් වී ඇති බව විචාරකයෝ පෙන්වා දෙති. ආදරය හා අභිරහස් මුසු වූ මෙම චිත්‍රපටය සරල කතා මාතෘකාවක් සුවිශේෂී ලෙස ඉදිරිපත් කිරීමට උත්සාහ දැරුවද, එය සාර්ථක වී නොමැති බව පෙනේ.

රථවාහන පොලීසිය සමඟ උණුසුම් වාද විවාදයක නිරත වූ යාපනය දිස්ත්‍රික් පාර්ලිමේන්තු මන්ත්‍රී අර්චුනා රාමනාදන් මහතාට එරෙහිව පොලිස් විමර්ශනයක් ආරම්භ කර ඇත. මෙම සිද්ධිය අනුරාධපුර, රඹෑව ප්‍රදේශයේදී සිදුව ඇති අතර, මන්ත්‍රීවරයා විශේෂ VIP ආලෝක භාවිතා කරමින් ගමන් කිරීම හේතුවෙන් රථවාහන පොලීසිය විසින් එම වාහනය නවතා පරීක්ෂා කිරීමේදී මෙම ගැටුම ඇති වී තිබේ.

ශ්‍රී ලංකා ක්‍රිකට් ක්‍ෂේත්‍රයේ කීර්තිමත් ක්‍රීඩක ලසිත් මාලිංග විසින් රචනා කරන ලද "කිලර්: ද මැජික් ඔෆ් ට්වෙන්ටි වන්" නම් කෘතිය ඊයේ (20) කොළඹදී විශේෂ උත්සවයක් මගින් එළිදැක්විණි. කඩුලු දැවීමේ ප්‍රධාන උපක්‍රම 21ක් පිළිබඳව විශේෂ අවධානයක් යොමු කරමින් පන්දු යැවීමේ කලාව පිළිබඳ ගැඹුරු අවබෝධයක් ලබාදෙන මෙම කෘතිය ක්‍රිකට් ක්‍රීඩාවේ නියැලෙන සැමට වටිනා මගපෙන්වීමක් සපයයි.

කොළඹ මහාධිකරණ විනිසුරු මංජුල තිලකරත්න මහතාගේ නියෝගයකට අනුව, තීරුබදු රහිත වාහන බලපත්‍ර සම්බන්ධ වංචා චෝදනාවලට ලක්ව සිටින විශේෂඥ නිර්වින්දන වෛද්‍යවරයකු වන හපුආරච්චිගේ දොන් බුද්ධික නුවන් කරුණාරත්න මහතා කොළඹ ප්‍රධාන අධිකරණ වෛද්‍ය නිලධාරියා වෙත යොමු කිරීමට ඊයේ (20) දින නියම කරන ලදී.

පාර්ලිමේන්තුවේ ප්‍රධාන විපක්ෂය වන සමගි ජන බලවේගය දැඩි අභ්‍යන්තර අර්බුදයකට මුහුණ දී සිටී. පක්ෂයේ ජාතික ලැයිස්තු මන්ත්‍රී ධුර සඳහා ව්‍යාපාරිකයන්ගෙන් මිලියන ගණනක් එකතු කිරීම, නායක සජිත් ප්‍රේමදාස මහතාගේ තීරණ සහ පක්ෂ යාන්ත්‍රණය නිසි පරිදි ක්‍රියාත්මක නොවීම මෙම අර්බුදයට මූලික හේතු වී තිබේ.

ජනවාරි 20, 2025 දින එක්සත් ජනපද ජනාධිපති ඩොනල්ඩ් ට්‍රම්ප් සිය දෙවන ධුර කාලයේ පළමු දිනයේදීම විධායක නියෝග රැසක් නිකුත් කරමින් බයිඩන් පරිපාලනය විසින් ක්‍රියාත්මක කරන ලද ප්‍රතිපත්ති රැසක් අහෝසි කිරීමට පියවර ගෙන තිබේ. මෙම ක්‍රියාමාර්ග හරහා "ඇමරිකා ප්‍රථම" (America First) යන ඔහුගේ ප්‍රතිපත්ති නැවත ක්‍රියාවට නැංවීමට පියවර ගෙන ඇත.