ඩෙංගු නැවත දරුණු වෙයි
වැඩිම කොළඹ-දෙවැනි තැන ගම්පහට
දිවයිනේ සියලූ ප‍්‍රදේශවලින් මේ වනවිට ඩෙංගු රෝගීන් 22,799ක් වාර්තාවී ඇති අතර
මේ දක්වා මරණ 40ක් වාර්තාවී ඇත. ඩෙංගු රෝගය මහා වසංගතයක් බවට පත්වී ඇතැයි සෞඛ්‍ය අමාත්‍යාංශයේ ආරංචි මාර්ග ඊයේ නිවේදනය කළා.
වැඩිම ඩෙංගු රෝගීන්ගේ ප‍්‍රමාණය 7369 දෙනකු ජූලි 8 වැනි දින වනවිට
කොළඹ දිස්ත‍්‍රික්කයෙන් වාර්තාවී තිබෙන අතර දෙවැනි වැඩිම සංඛ්‍යාව වන 2091 වාර්තා වූයේ ගම්පහ දිස්ත‍්‍රික්කයෙනි.
නුගේගොඩ, දෙහිවල, ගල්කිස්ස, කොලොන්නාව, කඩුවෙල, මොරටුව, මහරගම, පිළියන්දල, ජා-ඇළ, මහර, ගම්පහ, වත්තල, කැලණිය, අත්තනගල්ල, බේරුවල හා පානදුර යන ප‍්‍රදේශත් මුළු මහනුවර දිස්ත‍්‍රික්කයේ ඩෙංගු රෝගීන් බහුලව
රෝගීන් 1879ක ප‍්‍රමාණයක් කොළඹ මහනගර සභා ප‍්‍රදේශයෙන් වාර්තා වූ අතර, ගත වූ දින අට තුළදී රෝගීන් දහසකට අධික ප‍්‍රමාණයක් කොළඹ දිස්ත‍්‍රික්කයෙන් වාර්තා වී තිබේ.
ඩෙංගු රෝගීන් වැඩි වශයෙන් නේවාසිකව ප‍්‍රතිකාර ලබන මුල්ලේරියාවේ බෝවෙන රෝග (අයි. ඞී. එච්.) රෝහලට රෝගීන් පැමිණෙන සංඛ්‍යාව දිනෙන් දින වැඩිවන නිසා එහි බාහිර රෝගීන්ගේ ප‍්‍රතිකාර රාත‍්‍රී 8.00 දක්වා පැවැත්වේ.
කළුබෝවිල දකුණු කොළඹ ශික්ෂණ රෝහල, රිජ්වේ ආර්යා ළමා රෝහල, මීගමුව, මහනුවර හා කොළඹ ජාතික යන රෝහල් මෙම රෝගීන් වැඩි වශයෙන් ප‍්‍රතිකාර ලබාගන්නා ආයතන මේ සමස්ත ප‍්‍රමාණයෙන් සියයට 47.61ක ප‍්‍රමාණයක් බස්නාහිර පළාතෙන් වාර්තා වී ඇති අතර, පාසල්වල මෙම රෝගය පැතිර යාම 2015දී 32% ප‍්‍රමාණයේ සිට 2016දී 38% දක්වා වැඩි වී ඇත. ඉදිකිරීම් භූමිවල මෙම ප‍්‍රමාණය 38% සිට 40% දක්වා මෙම වසරේ දී වැඩි වී ඇත. කොළඹ නගරයේ ඉදිකිරීම් කරන ආයතන 70 කට අනතුරුදායක අවවාදමය රතු ලේඛන නිකුත් කර ඇතැයි ද එම ආරංචි මාර්ග පැවසීය.
මෙම තත්ත්වය සමනය කිරීම සඳහා සෞඛ්‍ය අමාත්‍යාංශයේ මෙහෙයවීමෙන් ජූලි 13, 14 හා 15 යන දිනවලදී මෙම උවදුර තදින් පැතිරී ඇති දිස්ත‍්‍රික්කවල දැඩි ඩෙංගු මර්දන වැඩසටහනක් ක‍්‍රියාත්මක කරනු ඇත. ඒවා අනුව මෙම විශේෂ වැඩසටහන කොළඹ, ගම්පහ, කළුතර, කුරුණෑගල, මහනුවර, මාතලේ, ගාල්ල සහ මාතර යන දිස්ත‍්‍රික්කවල ව්‍යාප්ත කෙරෙනු ඇත.
