සිංගප්පූරු මරිනා බේ සෑන්ඩ් නිර්මාණකරුගේ
කොළඹ ඇලවුණ ගොඩනැගිල්ලේ වැඩ පටන් අරන්
මේ දිනවල කොළඹ කොම්පඤ්ඤවීදිය ආසන්නයෙන් ගමන් කරන කෙනෙකුට ඉදිකරමින් පවතින අමුතු හැඩයේ ගොඩනැගිලි දෙකක් දැක ගන්නට ලැබෙනු ඇත. එක් ගොඩනැගිල්ලක් සෘජුව තිබියදී අනෙක් ගොඩනැගිල්ල එයට හේත්තු කර තිබෙන ඇළවුණ ආකාරයක් දිස්වන මේ නිවාස සංකීර්ණය ලංකාවේ පෙර නොවූ විරූ ඉදිකිරීමකි.
මේ කාලයේ ලෝකයේ අංක එකේ ගෘහ නිර්මාණ සැලසුම්කරුවෙකු ලෙස සැලකෙන
ඊශ්‍රායලයේ උපන් මොෂෙ සැෆ්ඩි මෙම ඉදිකිරීමේ නිර්මාණකරුය.සිංගප්පූරුවේ මරිනා බේ සෑන්ඩ්,මිසූරියේ කෆ්මාන් සෙන්ටර් ඇතුළු ඉදිකිරීම් නිර්මාණ රාශියක් ඔහුගේය.
කොම්පඤ්ඤ වීදියේ බේරේ වැවට යාබදව වර්ග අඩි 8000 ක පමණ භූමියක් ආවරණය කරමින් ඉදිවන ‘කලම්බු රෙසිඩන්ෂන් අල්ටයාර්‘ ගොඩනැගිලි ද්විත්වයේ ඇළවුණ ගොඩනැගිල්ල තට්ටු 63 කින්ද සෘජු ගොඩනැගිල්ල තට්ටු 68 කින්ද යුතු වනු ඇත.
ගොඩනැගිල්ල මීටර 240 ක් උස වනු ඇත.මෙහි නිවාස 400 ක් පිහිටුවන්නට සැලසුම් කර ඇත. පිහිනුම් තටාක,ව්‍යායාම අංගන ඇතුළු සියලු නාගරික ජීවන අවශ්‍යතා සපුරන්නට එය යොදා ගැනෙණු ඇත.
ඉදිකිරීම සිදු කරන්නේ ඉන්දියානු සමාගමක ඩුබායි ශාඛාව මගිනි.ඉදිකිරීම අවසන්වන්නට නියමිතව ඇත්තේ ලබන 2017 වසරේය.
වාර්තාවන ආකාරයට මෙහි නිවාස රාශියක් දැනටමත් විකිණී අවසන්ය. නිදන කාමර තුනක නිවසක් ලක්ෂ 900 කට ආසන්න මිලකට අලෙවි කර ඇත.
එම ගොඩනැගිල්ලේ විස්තරය දැක්වෙන ඡායාරූප හා වීඩියෝවක් පහතින්
ඉදි කළ පසුව 2017 දී
