තම ගැබිනි බිරියට සිහිසුන් වන තුරු පහරදී ඇය පණ පිටින්ම වළ දමා මරා ඇගේ් සිරුර සැඟවූ බවට අනුරාධපුර මහාධිකරණය හමුවේ අධිචෝදනා ලබා සිටි යුද හමුදාවේ හිටපු ක්‍රීඩා උපදේශකවරයකු එම චෝදනාවට වරදකරු බවට නිගමනය කළ උතුරු මැද
පළාත් බද මහාධිකරණ විනිසුරු මංජුල තිලකරත්න මහතා ඔහුට ඊයේ (15දා) මරණ දඬුවම නියම කෙළේය. මෙසේ මරණ දඬුවම නියම වූයේ මහවිලච්චිය පේමඩුව ගුලුපෙත්තෑව පදිංචිකරුවකු වන රන්කොත් පේඩිගේ දේවසේන සමරක්කොඩි නමැති 41 හැවිරිදි යුද හමුදාවේ හිටපු ක්‍රීඩා උපදේශකවරයකුටය.
ඊට අමතරව
ඊට අමතරව මුදලින් රුපියල් පන් දහසක දඩයක් ගෙවන ලෙසටද විත්තිකරුට තවදුරටත් නියෝග කළ මහාධිකරණ විනිසුරුවරයා එම දඩ මුදල ගෙවීම විත්තිකරු පැහැර හරින්නේ නම් ඔහු තවත් මාස තුනක ලිහිල් සිර දඬුවමකට යටත් කරනු ලැබීය.
මේ සිද්ධියට අදාළ නඩුවේ තීන්දු ප්‍රකාශයට පත් කරමින් මහාධිකරණ විනිසුරු මංජුල තිලකරත්න මහතා විවෘත අධිකරණය අමතමින් පැවැසුවේ විත්තිකරුට එරෙහිව පැමිණිල්ල විසින් නඟා ඇති චෝදනා සාධාරණ සැකයෙන් ඔබ්බට ඔප්පු කිරීමට පැමිණිලි පාර්ශ්වය සමත්ව ඇති බවයි.
පැමිණිල්ල වෙනුවෙන් රජයේ අධිනීතිඥ ධම්මික උඩවත්ත මහතා පෙනී සිටි අතර විත්තිකරු වෙනුවෙන් රජයෙන් පත් කළ නීතිඥ අමිල කොලොන්න ආරච්චි මහතා පෙනී සිටියේය.
අනුරාධපුර - ආනන්ද කරුණාදාස,මහේෂ් විජේසූරිය
