සයිටම් ගැටලුවට විසඳුමක් ලබා දෙනතුරු දැනට වෛද්‍ය සිසුන් සිය අධ්‍යයන කටයුතුවලින් බැහැරව සිටින බැවින් ඉදිරි වසරේ රජයේ රෝහල්වල සීමා වාසික වෛද්‍යවරුන්ගේ විශාල හිඟයක් ඇති වන බවට රජයේ වෛද්‍ය නිලධාරීන්ගේ සංගමය මේ හමුවේදී ජනාධිපතිවරයාට පෙන්වා දී ඇත.
මෙහිදී විශ්වවිද්‍යාල ප්‍රතිපාදන කොමිෂන් සභාවේ සභාපති මහාචාර්ය මොහාන් ද සිල්වා සහ මහාචාර්ය කොල්වින් ගුණරත්න යන මහත්වරු සයිටම් ආයතනය වෙනුවෙන් ජනාධිපතිවරයා ඉදිරියේ කරුණු පැහැදිලි කර දී ඇති අතර රජයේ වෛද්‍ය නිලධාරීන්ගේ සංගමය එම අවස්ථාවේදී එම මහාචාර්යවරුන් දෙපළට වෛද්‍ය වෘත්තියේ වගකීම පැහැදිලි කර දී තිබේ. එම අවස්ථාවේ උණුසුම් තත්ත්වයක් ඇති වී තිබෙන අතර ජනාධිපතිවරයාගේ මැදිහත් වීමෙන් එය සමථයකට පත්ව තිබේ.
පැය දෙකක් පුරා පැවැති මේ සාකච්ඡාවේදී වෛද්‍ය නිලධාරීන්ගේ සංගමය මඟින් සයිටම් ගැටලුව සම්බන්ධයෙන් විසඳුම් දෙන ලෙස යෝජනා 3ක් ඉදිරි පත්කර ඇත.
01. වෛද්‍ය විද්‍යාවේ ප්‍රමිතිය අනතුරට ලක් කිරීම.
02. රාජ්‍ය වෛද්‍ය පීඨවල සිසුන් අධ්‍යාපන කටයුතුවලින් බැහැරව මහමඟට බැස තිබීම.
03. වංචනික ආයතනයක රැවටීමට ලක්වූ සිසුන්ගේ දුක් ගැනවිල්ලක් ඉදිරිපත් වීම යන කරුණුවලට විසඳුම් ඉල්ලා තිබේ.
එම අවස්ථාවේ ජනාධිපතිවරයා විසින් එයට විසඳුම් ලෙස ඉදිරිපත් කරන යෝජනා ඉදිරි සාකච්ඡා වටයේදී ඉදිරිපත් කරන ලෙස රජයේ වෛද්‍ය නිලධාරීන්ගේ සංගමයට දැනුම් දී ඇති අතර ඉදිරි සාකච්ඡා වටයකදී නැවත හමුවන තුරු තීරණයකින් තොරව එම සාකච්ඡාව නිමාවට පත්වූ බව රජයේ වෛද්‍ය නිලධාරීන්ගේ සංගමයේ ලේකම් නවීන් ද සොයිසා මහතා සඳහන් කළේය.
එම සාකච්ඡාව සඳහා උසස් අධ්‍යාපන ඇමැති ලක්ෂ්මන් කිරිඇල්ල මහතා ඇතුළු විශ්වවිද්‍යාල ප්‍රතිපාදන කොමිසමේ සභාපතිවරයා, සියලුම රාජ්‍ය වෛද්‍ය පීඨවල පීඨාධිපතිවරු, වෛද්‍ය පීඨ ආචාර්ය සංගමයේ නියෝජිතයන්, ශ්‍රී ලංකා වෛද්‍ය සභාවේ ලේඛකාධිකාරිවරුන්, රජයේ වෛද්‍ය නිලධාරීන්ගේ සංගමයේ නියෝජිතයන්, විශේෂඥ වෛද්‍යවරුන්ගේ සංගමයේ නියෝජිතයන් සහ සයිටම් ආයතනයේ නියෝජිතයන් සහභාගි වී ඇත.
(පණ්ඩුක සමරසේකර)
