පාකිස්තානු නිවේදිකාවගේ
ක්ලාන්තය මරණයක් කළ අන්තර්ජාලය
අන්තර්ජාලයේ ‘වෛරල් නිවුස්‘ ලෙස පැතිරෙන ඇතැම් අසත්‍ය ආරංචි ලංකාවේ ඇතැම් ප්‍රධාන මාධ්‍ය වල පවා ඇත්ත නැත්ත සොයා නොබලා පළවූ තවත් එක් වාර්තාවක් මේ දිනවල පැතිරෙමින් පවතී.
පාකිස්තානු රූපවාහිනී නිවේදිකාවක සජීවී පටිගත කිරීමක් අතරතුර මියගිය ආකාරය දැක්වෙනවා යයි කියන ආකර්ෂණීය වීඩියෝව එවැන්නකි.
සුන්දර රූසපුවකින් යුත් මෙම කාන්තාව ඇස් අඩවන් කර කැරකිල්ලක් සෑදුණ ආකාරයට ක්‍රේන් එකක සිට ඇද වැටෙන අයුරුත්
ඇයව පසුව පිරිස මගින් ඔසවා යන අයුරුත්
ෆේස් බුක් ඔස්සේ වැඩි වශයෙන් පැතිර ගිය මෙම වීඩියෝව සමග පළවූ ආරංචියෙන් කියැවුනේ ඇය එම අවස්ථාවේ මියගිය බවත් හදිසි හෘද රෝගයක් මෙම මරණයට හේතුව බවත්ය.
නමුත් මේ ගැන අප කළ සොයා බැලීමේදී මෙම පුවත මුළුමණින්ම අසත්‍ය බව සහ එම පුවත ගොතා මුලින්ම පතුරා ඇත්තේ එක්තරා ඉන්දීය සමාජ මාධ්‍ය පිටුවක් සිය ප්‍රවර්ධනය උදෙසා බව සොයාගන්නට හැකිවිය.
පකිස්තානයේ 92News නමැති නාලිකාවේ සේවය කරන ඉර්සා කාන් (Irza Khan) නමැති මෙම නිවේදිකාව තවමත් ජීවතුන් අතර යහතින් සිටින්නියකි.
ඇය මින් වසරකට පෙර 2016 පාකිස්තානයේ ටෙහ්රික් ඊ පක්ෂයේ රැළියක් වාර්තා කරන්නට එළිමහනේ ක්රේනයක නැග සජීවීව වාර්තා ගෙනඑමින් සිටි අවස්ථාවක සූර්ය තාපයට නිරාවරණය වීමෙන් ක්ලාන්ත ගතියක් ඇතිවී ඉහළ සිට ඇදවැටීම මෙම සිදුවීමයි.
නමුත් එම අවස්ථාවේ අසළ අය ඇය අල්ලාගෙන ප්‍රතිකාර සඳහා යොමු කරන අතර ටික වේලාවකට පමණක් අදාළ රාජකාරියෙන් බැහැරවී නැවත සජීවී ඉදිරිපත් කිරීම ඇය විසින් සිදුකර තිබුණි.
ඇය දැනටත් පාකිස්තානු නාලිකාවන්හි ප්‍රසිද්ධ චරිතයක් වන අතර ඇය මියගිය බවට මෑතක සිට පළවන ආරංචි නිසා ඇයගේ රසික රසිකාවියන් මෙන්ම ඇයවද විස්මයට පත්කර ඇත.
මේ නිසා ඇය ඇගේ ෆේස් බුක් පිටුව ඔස්සේ ‘මම තාම යහතින්‘ කියමින් ඊයේ වීඩියෝවක්ද නිකුත් කර තිබුණි.
පදනම් විරහිත ආරංචියට මුල්වූ වෛරල් විඩියෝව හා ඇය ඊයේ නිකුත් කළ වීඩියෝව පහතින්
