නව දේශීය ආදායම් බදු පනතෙන් ඉවත් කර තිබෙන සියලු සහන මහින්ද රාජපක්‍ෂ මහතාගේ ආණ්ඩුවක් යටතේ නැවත ලබා දෙන බව පාර්ලිමේන්තු මන්ත්‍රි බන්දුල ගුණවර්ධන පවසයි.
හෙතෙම මේ බව කියා සිටියේ ඔහු විසින් රචනා කළ "බදු දඩයම, නව දේශීය ආදායම් පනත" කෘතිය එළි දැක්වීමේ අවස්ථාවට එක්වෙමිනි හිටපු ජනාධිපති මහින්ද රාජපක්‍ෂ මහතාගේ ප්‍රධානත්වයෙන් මෙම උත්සවය හෙක්ටර් කොබ්බෑකඩුව පර්යේෂණ ආයතනයේදී පැවැත්විණි.
වැඩිදුරටත් අදහස් දක්වමින් මන්ත්‍රිවරයා මෙසේ ද කීය.
මහින්ද රාජපක්‍ෂ මහතා ජනාධිපති වීමෙන් පසු 2006දී දේශීය ආදායම් පනත ගෙනාවා. පිටු හතළිස් හතරක් පුරාවට සෑම ක්‍ෂේත්‍රයකම වෘත්තිකයන්ට බදු සහන ලබාදීලා තිබුණා. එම පිටු 44 අවශ්‍යතා
අප රට භාරදුන්නේ සංවර්ධන මාවතේ ඉහළටම ගිහින්. මහින්ද රාජපක්‍ෂ යුගයේදී අයවැය පරතරය 5%ට අඩුකළා. පිටු 44ක් පුරා තිබුණු බදු සහන රවි කරුණානායක මහතා පිටු 2කට අඩු කළා. එය තමයි තිබෙන ප්‍රධාන ප්‍රශ්නය. මේ හේතුවෙන් සිනමාකරුවන්ට නාට්‍යකරුවන්ට, සංගීතඥයන්ට, ග්‍රන්ථ කත්තෘවරුන්ට ඇතුළු සෑම ක්‍ෂේත්‍රයකම වෘත්තිකයන්ගේ බදු සහන අසීමිත ලෙස ඉවත් කර තිබෙනවා.
රාජපක්‍ෂ මහතා ලබාදුන් බදු සහන ඉතිහාසයේ සෑම දෙනාටම අමතක වන ආකාරයට වැළලී යන දෙයක් බවට පත් වෙනවා. මම මේ කෘතියෙන් කරලා තියෙන්නේ මහින්ද රාජපක්‍ෂ මහතා මුදල් ඇමැතිවරයා වශයෙන් මේ රටේ විවිධ ක්‍ෂේත්‍රයන්ට ලබා දී තිබූ බදු සහන තව පනත් කීයක් ආවත් අනාගතයට බලපාන්න පුළුවන් ආකාරයට ඉදිරිපත් කිරීමයි.
නැති කරලා තිබෙන බදු සහන මොනවද කියලා මේ තුළින් පැහැදිලි වෙනවා. මහ දවල් මහ බැංකුවේ ඇති වූ මහා මුදල් මංකොල්ලය නිසා රජයේ සුරැකුම්පත් හා භාණ්ඩාගාර බිල්පත්වල ආයෝජනය කළ ඇමෙරිකානු ඩොලර් බිලියන දෙකකට වැඩිය අරගෙන ගිහින් තිබෙනවා. එතකොට ඇමෙරිකානු ඩොලර් බිලියන 6ක් තමයි එතැන එකතුව.
හිටපු දේශීය ආදායම් කොමසාරිස් ආර්.පී.එල්. වීරසිංහ මහතා
මේ බදු පනත නියමිත ආයතනවලට යවලා නෙමෙයි සකස් කරලා තිබෙන්නේ. පළමුවෙනි වතාවට ලංකා ඉතිහාසයේ අත්දැකීමක් නැති විශේෂඥයන් විසින් සකස් කෙරූ එකක්. ඒ නිසා මේ පනත එළියට එනකල්ම තිබුණේ රහසක් හැටියටයි. එකම දේශීය ආදායම් පනතක්වත් මේ වගේ අභියෝගයට ලක් වුණේ නැහැ.
මේ පනතට නඩු 10ක් දාලා තිබුණා. ඒවා නිකම්ම නිකන් නඩු නෙමෙයි. නීතිඥ සංගමයත් ගියා. දේශීය ආදායම් දෙපාර්තමේන්තුවත් ගියා. අයිතිකාරයෝම ගියා ඒ පනතට විරුද්ධව එය කෙටුම්පත් කිරීමෙත් තිබෙනවා යම් කිසි නොගැළපෙන බවක්. මේ පනත යටතේ සහන දෙන්නේ නැතුව ගියොත් දේශීය ව්‍යාපාරිකයන්ට තිබුණු තැන නැති වෙලා විදේශ ව්‍යාපාරිකයන්ට තැන හැදෙන්න පුළුවන්.
ඉෂාරා සිල්වා
