හරක් ලොරිය පසුපස පොලිසිය එළවද්දී
පැත්තක බයික් එකේ ගිය
උපාධිධාරි අක්කා නගෝ මරුට
අනුරාධපුර-පුත්තලම ඒ-4 ප්‍රධාන මාර්ගයේ චුලන්කුලම් ප්‍රදේශයේදි එළගවයින් 18 දෙනකු පටවාගත් ලොරියක් ලූහුබඳිමින් පොලිස් පිරිසක් රථයකින් එද්දී නොනවත්වා ධාවනයවූ එම ලොරිය ඉදිරියෙන් පැමිණි කැබ් රථයක සහ යතුරු පැදියක වැදීමෙන් යතුරු පැදියේ ගමන් ගත් තරුණියන් දෙදෙනකු ඊයේ ජීවිතක්ෂයට පත් වුණා.
උදේ 8 ට පමණ සිදුවු මෙම අනතුරින්
මරණයට පත්වු තරුණියන් දෙදෙනා එකම පවුලේ අක්කා නගෝ දෙදෙනකු වූ අතර දෙදෙනාම උපාධිධාරිනියන් විය. මේ අයගෙන් එක්කෙනෙකු එම ස්ථානයේදීමත් අනෙක් තැනැත්තිය රෝහලේදීත් මිය ගොස් තිබුණි.
ජයනී ස්වේතා ජයකොඩි (32) සහ සමාධි නවෝද්‍යා ජයකොඩි (29) යන මෙම අක්ක නගෝ දෙදෙනා
ඔවුන් දෙදෙනා කිසියම් අවශ්‍යතාවයක් සඳහා අනුරාධපුර නගරය බලා පැමිණෙමින් සිටියදී මෙම අනතුරට ලක්ව ඇත.
හොර වැඩක් කර පොලිසියට බියෙන් පළායද්දී අපරීක්ෂාකාරී රථ ධාවනය නිසා සිදුවූ මෙම
අනතුර දැක ආවේගශීලී වූ ප්‍රදේශවාසීන් පිරිසක් ලොරියේ රියදුරාට පහරදී පෙරළුණු ලොරියවද ගිනි තැබීමට උත්සාහ දැරූ බවද වාර්තා විය. පොලිසිය මැදිහත්වී තත්වය සමනය කර තිබේ.
ලොරිය පෙරළුණු අවස්ථාවේ එහි සිටි ගවයින් පිටතට පැන හිස් ලූ ලූ අත දිවගොස් තිබේ. අනතුරින් ලොරියටද දැඩි හානි සිදුවිය.
ලොරිය පසුපස පන්නා ගෙන ආ පොලීස් රථය අනතුරින් තුවාල වූවන් රෝහල් කරා ගෙනයාමට උදව් නොකර වහාම ආපසු හරවාගෙන අනුරාධපුරය දෙසටයාම ගැනද අවට සිටි අයගේ අප්‍රසාදය පළවිය. මුලික පරික්ෂණවලදී අනාවරණය වී ඇත්තේ ත්‍රීකුණාමලයේ සිට වැලිසරට මස් පිණිස මැරීම සඳහා එළගවයින් 18 දෙනෙකු ලොරියේ ප්‍රවාහනය කර ඇත්තේ ඒ සඳහා බලපත්‍රයක්ද ලබාගෙන බවකි. නමුත් පොලිස් අණ නොතකා ඔවුන් දිගටම ධාවනය කිරීම ගැටලු සහගත විය.
අනතුර සිදුවු අවස්ථාවේ ලුහුබැඳි පොලිස් නිලධාරීන් දෙදෙනා ක්‍රියාකර තිබෙන ආකාරය ගැන පරීක්‍ෂණයක් සිදු කිරීමටද නියමිතය.
