අද පැවැති මාධ්‍ය හමුවකදී අමාත්‍යවරයා ප්‍රකාශ කළේ දැනට පවතින පෙට්‍රල් තොග එදින දක්වා නිකුත් කිරීමට ප්‍රමාණවත් බවයි.
ඔක්ටේන් 92ක සහ 95 පෙට්‍රල් මෙට්‍රික්ටොන් 40,000ක නෞකාවක් ලබන 08 වනදා කොළඹට පැමිණීමට නියමිත බව අමාත්‍යවරයා සඳහන් කළේය.
අයි.ඕ.සී සමාගම පසුගිය 15 වනදා මෙරටට ගෙන්වූ පෙට්‍රල් තොගය ප්‍රමිතියෙන් තොරවීම හේතුවෙන් ප්‍රතික්ෂේප කිරීමත් සමඟ අර්බුදය නිර්මාණය වී තිබේ.
එම පෙට්‍රල් තොගය සහිත නෞකාව මේ වන විට ත්‍රිකුණාමලය වරාය ආශ්‍රිතව නවතා ඇති බවත්, එය නැවත භාරගන්නා ලෙස ප්‍රබල ඉල්ලීම් සිදු කෙරුණ ද ඒ සඳහා අවස්ථාව ලබා නොදුන් බවත් අර්ජුන රණතුංග මහතා මාධ්‍ය හමුවේදී ප්‍රකාශ කළේය.
ඉන්ධන නැව ප්‍රතික්ෂේප කිරීමෙන් පසු සිදු වූ ඇතැම් සිද්ධීන් සැකසහිත බව අමාත්‍යවරයා වැඩිදුරටත් සඳහන් කළ අතර පුද්ගලීකරණය කිරීම තුළින් සිදුවිය හැකි විනාශය මෙම අවස්ථාවේ තේරුම් ගත හැකි බව ද අර්ජුන රණතුංග මහතා වැඩිදුරටත් ප්‍රකාශ කළේය.
