අධිකරණයට අපහාස කිරීමේ චෝදනාවන්ට වරදකරු වූ බොදුබල සේනාවේ මහලේකම් ගලගොඩඅත්තේ ඥනසාර හිමියන්ට බරපතළ වැඩසහිත වසර 6ක සිරදඬුවමක් අභියාචනාධිකරණය අද නියම කළේය. ගලගොඩඅත්තේ ඥනසාර හිමිට එරෙහිව
හෝමාගම හිටපු මහේස්ත‍්‍රාත් සහ කොළඹ ප‍්‍රධාන මහේස්ත‍්‍රාත් රංග දිසානායක මහතා විසින් කරන ලද පැමිණිල්ලකට තීන්දුව ලබාදෙමින් අභියාචනාධිකරණය මෙලෙස නියම කර තිබේ.

ඥානසාර හිමිට එරෙහිව චෝදනා 4ක් ගොනු කර තිබූ අතර ඉන් එකක් වූයේ අධිකරණය මෙහෙයවූ විනිසුරුට අසැබිවදනින් අපහාස කිරීමයි.

අදාළ චෝදනා 4ටම උන්වහන්සේ වරදකරු බව අභියාචනාධිකරණය සභාපති විනිසුරු ප්‍රිති  පද්මන් සූරසේන සහ ශිරාන් ගුණරත්න යන මහත්වරුන් විසින් තීන්දු කරනු ලැබීය.

මාධ්‍යවේදී ප‍්‍රගීත් එක්නැලිගොඩ අතුරුදන් වීමේ නඩුව අවසන් වීමෙන් පසුව හෝමාගම මහේස්ත‍්‍රාත් අධිකරණ ශාලාව තුළ කළහකාරී ලෙස හැසිරීමෙන් අධිකරණයට අපහාසයක් සිදුව ඇති බව සඳහන් කරමින් ඥනසාර හිමියන්ට එරෙහිව මෙලෙස චෝදනා ගොනු කර තිබුණි.
 මින් පෙර නඩුවේදී ප්‍රගීත් එක්නැලිගොඩගේ බිරියට බැණ වැදීම නිසාද හිමියන් සති දෙකක සිර දඩුවමකට යටත් විය.
වසර 19ක සිරදඬුවමක් වසර 6 ගෙවී යන ලෙස අද දඬුවම ලබාදීමට අධිකරණය නියෝග කළේය.
 මෙම නඩුවේ මූලික වටයේ විභාගයේදී සිද්ධිය විස්තර කරමින්
 කොළඹ අතිරේක මහේස්ත්‍රාත් රංග දිසානායක අභියාචනාධිකරණය හමුවෙහි මෙසේ කියා තිබුණි.

‘‘2006 ඔක්තෝබර් 06 වැනිදා සිට මා මහේස්ත්‍රාත්වරයෙකු ලෙස වසර 12 ක් සේවය කර තිඛෙනවා. ඒ කාලය තුළම මෙවැනි දෙයක් සිදුවී නැහැ. මාධ්‍යවේදියෙකු වන ප්‍රදීප් එක්නැලිගොඩ ගේ අතුරුදන්වීම සම්බන්ධ නඩුවක් හෝමාගම මහේස්ත්‍රාත් අධිකරණයේ විභාග වුණා.
2016 ජනවාරි 25 වැනිදා මෙම නඩුවට සම්බන්ධ විශේෂ දෙයක්
සිදු වූවා.එහිදී කරුනු දැක්වීම් විමසා මා සැකකරුවන් හයදෙනෙකු තවදුරටත් රිමාන්ඩ් බාරයට පත් කිරීමට නියම කළා.ටිකකින් වෙනත් නඩුවක් අධිකරණය හමුවෙහි කැඳවනු ලැබුවා. ඒ සමඟම විශේෂ දෙයක් සිදු වුනා. අසුන් ගෙන සිටි ස්වාමීන්වහන්සේ නමක් විනිශ්චයාසනය දෙසට පැමිණ සිට
ගත්තා.


මාසිටි අසුන හා ස්වාමීන්වහන්සේ අතර දුර අඩි 15 ක් පමණ ඇති. ‘‘රණවිරුවන් හිරේ දමා තිබෙනවා .කොටි එළියට දමා තිබෙනවා. මේ සුද්දාගේ නීතිය අපි පිළි ගන්නේ නැහැ.‘‘ ලෙස කියමින් දේශන ස්වරූපයෙන් එම ස්වාමීන්වහන්සේ කෑගසමින් සිටියා. අධිකරණයේ
අවසරයකින් තොරව කිසිවකුට එලෙස කතා කරන්න බැහැ.
මා එකවරම විශ්මයට පත් වුණා. මා අධිකරණයේ භාෂා පරිවර්තකට කතා කර හැසිරිය යුතු ආකාරය දන්වන ලෙසට පැවසුවත් එම ස්වාමීන්වහන්සේ එය නොතකා දිගින් දිගටම අදහස් දක්වමින් සිටියා.
එම ප්‍රකාශය  බැගෑපත් ඉල්ලීමක් නොව. එය නියෝගයක් ස්වරූපයෙන් කළ ප්‍රකාශයක් බව හැඟී ගියා. රණවිරුවන් ලෙස එම ස්වාමීන් වහන්සේ අදහස් කළේ එම සැකකරුවන් බව මට හැඟී ගියා.
එවිටම රජයේ අධිනීතීඥවරයා සහ අගතියට පත් පාර්ශවය වෙනුවෙන් පෙනී සිටි නීතඥ උපුල් කුමරප්පෙරුම මහතා අධිකරණයට පැමිණියා.එවිට ස්වාමීන්වහන්සේ ගේ ස්වරය දැඩි වුනා.‘රජයේ නීතීඥවරුන්ගේ අදහස් අහන්න මට අවශ්‍ය නැහැ.ඔවුන් නීතිපතිගේ පොxxxයින්‘ යැයි උන්වහන්සේ ප්‍රකාශ කළා. එම ප්‍රකාශයෙන් පසුව එම ස්වාමීන් වහන්සේ අනෙකුත් ස්වාමීන්වහන්සේලා සමඟ අධිකරණ ශාලාවෙන් ඉවත්ව ගියා.

මා ඉදිරියේ එලෙස හැසීරීමෙන් එම ස්වාමීන්වහන්සේ අධිකරණයේ බලයට අභියෝග කිරීමෙන් සහ රජයේනීතීඥවරයාට තර්ජනාත්මක ස්වරූපයෙන් කතා කිරීමෙන් දඩුවම් ලැබිය යුතු වරදක් කළ බව හැඟී ගියා . ඒ අනුව අපරාධ නඩු විධාන සංග්‍රහයේ නීති ප්‍රකාරව මෙම ස්වාමීන් වහන්සේ අත්අඩංගුවට ගෙන අධිකරණයට ඉදිරිපත් කරන ලෙස හෝමාගම මූලස්ථාන පොලිස් පරීක්ෂකවරයාට නියෝග කරනු ලැබුවා.
එම ස්වාමීන්වහන්සේ මීට පෙර ජනාමාධ්‍ය මඟින් මා දැක තිබුණා.
එහෙත් එම ස්වාමීන්වහන්සේ හඳුනාගන්නා ලෙස මා අනෙක් නීතීඥවරුන් ගෙන් ඉල්ලීමක් කළා. එතැන සිටි නීතීඥ මහතෙකු වන උපාලි සේනාරත්න මහතා විසින් උන්වහන්සේ ගලගොඩඅත්තේ ඥානසාර හිමියන් ලෙස හඳුන්වා දෙනු ලැබුවා.‘‘

ගලගොඩඅත්තේ ඥනසාර හිමි අද මෙම තීන්දුව දෙන්නට දින දෙකකට පෙර   අසනීප තත්ත්වයක් හේතුවෙන් ශ‍්‍රී ජයවර්ධනපුර රෝහලේ ප‍්‍රතිකාර ලබමින් සිටි අතර තීන්දුව ලබාදෙන අද දිනයේ උන්වහන්සේ අධිකරණයේ පෙනී සිටියේ නැත. එ් අනුව අධිකරණ තීන්දුව වැලිකඩ බන්ධනාගාර අධිකාරිවරයාට දැනුම් දීමට ද අද නියෝග කර තිබේ.

හිමියන් අද දින අධිකරණය මගහැර රෝහල්ගතවීම පිළිබඳ පෙර ලිපිය මෙතැනින්

2016 හෝමාගම අධිකරණ කලබලේ මැද තමන් අතින් වරදක්වූ බව ඥාණසාර හිමි කිවූ හැටි (වීඩියෝ)