මාවනැල්ල ඇතුළු අවට ප‍්‍රදේශවල ප්රසිද්ධ ස්ථානවල ඉදිකර තිබූ බුද්ධ ප්රතිමාවලට පහරදී විනාශ කරමින් සිටි අන්‍යාගමික තරුණයන් දෙදෙනකු අතරින් එක් තරුණයකු ඊයේ (26 වැනිදා) අලුයම මාවනැල්ල පොලිසිය මගින් අත්අඩංගුවට ගෙන තිබේ.
කඩුගන්නාව, මාවනැල්ල පොලිස්‌ වසමට අයත් වෙලම්බඩ, ලියන්ගහවෙල ප්‍රදේශයේ තිබූ බුද්ධ ප්‍රතිමා හතරකට ඊයේ (26 දා) අලුයම් කාලයේ කිසිවකු විසින් හානි කර තිබිණි.
මේ අතරේ අලුයම 4.00 ට පමණ යතුරුපැදියකින් පැමිණි තරුණයන් දෙදෙනකු මාවනැල්ල ළිඳුලවත්ත මංසන්ධියේ තිබූ බුද්ධ ප්‍රතිමාවකට පහරදෙමින් එය විනාශ කරමින් සිට ඇති අතර එහිදී ඔවුන් බුදු පිළිමය කඩාදමන අයුරු දුටු ප්‍රදේශයේ තරුණයන් දෙදෙනකු සැකකරුවන් අල්ලා ගැනීමට උත්සාහ ගෙන ඇත.
ඒ අවස්‌ථාවේ යතුරුපැදියේ නැගී එක් සැකකරුවකු පලාගොස්‌ ඇත.
අත්අඩංගුවට ගත් සැකකරු මාවනැල්ල හිඟුල, දෙල්ගහගොඩ ප්‍රදේශයේ පදිංචි අන්‍යාගමික තරුණයකු බව පොලිසිය සඳහන් කරයි.
පලා ගිය සැකකරු අත්අඩංගුව ගැනීම සඳහා මාවනැල්ල පොලිසිය මගින් ඊයේ (26 දා) විශේෂ මෙහෙයුමක්‌ද අරඹා තිබිණි.
මීට පෙරද මේ අන්දමින් මහනුවර, කඩුගන්නාව, දොඩංවල ඇතුළු ප්‍රදේශ ගණනාවක පිහිටා තිබූ බුද්ධ ප්රතිමාවලට පහරදී විනාශ කිරීමේ සිද්ධීන් ගණනාවක්‌ පසුගිය දිනවල වාර්තා විය.
ඒ අනුව මෙම සිද්ධිය පිළිබඳ විශේෂ විමර්ශනයක්‌ සිදු කිරීම සඳහා පොලිස්‌පති පූජිත් ජයසුන්දර මහතාගේ නියෝගයෙන් ඊයේ (26දා) දහවල් රහස්‌ පොලිස්‌ කණ්‌ඩායමක්‌ මාවනැල්ල ප්‍රදේශයට පිටත් කර යැවූ බව පොලිස්‌ මාධ්‍ය ප්‍රකාශක පොලිස්‌ අධිකාරී නීතිඥ රුවන් ගුණසේකර මහතා පැවසීය.
සිද්ධියත් සමඟ ප්‍රදේශයේ ආරක්‍ෂාව තහවුරු කිරීම සඳහා පොලිස්‌ විශේෂ කාර්ය බළකාය ඇතුළු පොලිස්‌ කණ්‌ඩායම් කිහිපයක්‌ යෙදවීමට පියවර ගෙන තිබේ. සිද්ධිය සම්බන්ධයෙන් මාවනැල්ල ප්‍රදේශයේ බෞද්ධ ආගමික නායකයින් ඒකරාශී වී මාවනැල්ල බෙලිගම්මන පොත්ගුල් විහාරස්‌ථානයේදී විශේෂ සාකච්ඡාවකද නිරතවී ඇත.
ප්රසිද්ධ ස්ථානවල ඇති බුද්ධ ප්රතිමාවලට මේ අන්දමින් පහර දී විනාශ කිරීම කාගේ වුවමනාවක්‌ අනුව සිදුවන්නේද යන්න මේ වන විට විශාල අභිරහසක්‌ බවට පත්ව ඇති අතර මෙය ආගමික ගැටුමක්‌ නිර්මාණය කිරීමට දරන කිසියම් කුමන්ත්‍රණයක්‌ද යන්න පිළිබඳව ආරක්‍ෂක අංශවලට සැක මතුවී තිබේ.
සමන් ගමගේ සහ - යූ.ආර්. ජයන්ත සේනානායක
