අනුරාධපුර, තලාව ප‍්‍රදේශයේදී රාජ්‍ය බැංකුවක තිබූ සේප්පු කපා රුපියල් කෝටි 60 කට අධික මුදල් හා රන් භාණ්ඩ සොරාගෙන ගිය සංවිධානාත්මක අපරාධ කල්ලියක නායකයා ඇතුළු සැකකරුවන් 6 දෙනකු 22දා
බස්නාහිර පළාත් බුද්ධි කොට්ඨාසය හා එප්පාවල පොලිසිය එක්ව අත්අඩංගුවට ගෙන තිබේ.
එම බුද්ධි කොට්ඨාසය හා එප්පාවල පොලිසිය සිදුකළ විශේෂ මෙහෙයුමකදී මෙම සැකකරුවන් සුඛෝපභෝගී මෝටර් රථයකින් ගමන් කරමින් සිටියදී කොටුකරගත් බවද හෙතෙම කීය.
අවුරුදු 20 ත් 50 ත් අතර වයසේ පසුවන මෙම සැකකරුවන් එප්පාවල ප‍්‍රදේශයේ පදිංචිකරුවන් බවද හෙතෙම පැවැසීය.
මෙම කල්ලිය මීට පෙර අනුරාධපුර හා පුත්තලම දිස්ත්‍රික්කවල පිහිටි බැංකු හා ඉන්ධන පිරවුම්හල් කොල්ල කෑම් ගණනාවකට සම්බන්ධ බවට තොරතුරු ලැබී ඇතැයිද එම නිලධාරීයා කීය.
මෙම කල්ලි නායකයා ඇතුළු පිරිස මීට පෙර වටිනා මරංචි රන් කැබලි බව පවසා තඹ කැබලි ලබාදී ගායකයන්, කී‍්‍රඩකයන් සහ ව්‍යාපාරිකයන් රවටා ලක්‍ෂ ගණනින් මුදල් ලබාගෙන වංචා කර ඇතැයි හෙළිවූ බවද එම නිලධාරීයා පැවැසීය.
ඉකුත් ජුලි 2 වැනිදා අලුයම මෙම සැකකරුවන් තලාව රාජ්‍ය බැංකුවකට ඇතුළුවී එහි මුදල් සේප්පු කපා රන් භාණ්ඩ හා මුදල් කොල්ලකෑම සම්බන්ධයෙන් රට පුරා දැඩි කතාබහක්ද ඇතිවිය.
මොවුන් මෙම කොල්ලකෑම්වලට අමතරව මහා පරිමාණයෙන් කේරළ ගංජා හා මත්ද්‍රව්‍ය ජාවාරම සිදුකරගෙන ගොස් ඇතැයිද හෙළිවී තිබේ.
සැකකරුවන් සොරාගත් රන් භාණ්ඩ හා මුදල් සොයා ගැනීමට ප‍්‍රශ්න කරමින් සිටින අතර අනුරාධපුරයේ වසන්ත සොයිසා ඝාතනයට සම්බන්ධ සැකකරුවන් තිදෙනකුද මෙම කල්ලියේ සිටින බවට තොරතුරු ලැබී ඇතැයි හෙතෙම කියා සිටියේය.
අනුරාධපුර පොලීසිය මේ පිළිබඳ වැඩිදුර පරීක්‍ෂණ සිදුකරති.
