මෙවර සිංහල මාධ්‍යයෙන් අ.පො.ස. උසස් පෙළ ජීව විද්‍යා ප්‍රශ්න පත්‍රයට පිළිතුරු ලියු සිසුන්ට වෛද්‍යවරුන්වීම් අවස්ථාව අහිමි වීමේ අවදානමක් මතුව ඇතැයි පිවිතුරු හෙළ උරුමයේ නායක, පාර්ලිමේන්තු මන්ත්‍රී උදය ගම්මන්පිල මහතා පෙන්වා දෙයි.
ඒ අනුව එය දෙමළ හා ඉංග්‍රීසි මාධ්‍යයන් පිළිතුරු ලියූ සිසුන්ට උද්ගත නොවූ අසාධාරණයක් වන බවද හෙතෙම පෙන්වා දෙයි.
මේ පිළිබඳ මාධ්‍ය දැනුවත් කිරීම සඳහාත් එසේම උසස් පෙළ ජීව විද්‍යාව විෂය නිර්දේශයේ අඩුපාඩු සහ එමගින් සිංහල මාධ්‍ය සිසුන්ට ඇති වන ගැටලු පිළිබඳවත් පෙන්වාදීම සදහා වූ හමුවක් මරදාන පිහිටි සී.එස්.ආර්. ශාලාවේදී ඊයේ (25දා) පැවැති අතර, එහිදී වැඩිදුරටත් අදහස් දැක්වූ පාර්ලිමේන්තු මන්ත්‍රී උදය ගම්මන්පිල සඳහන් කර සිටීයේ,
"වසර ගණනාවකින් පසු 2017 වසරේදී ජීව විද්‍යාවට අලූත් විෂය නිර්දේශයක් ඉදිරිපත් කරනවා. මෙම විෂය නිර්දේශය හදන්නේ ඉංග්‍රීසි භාෂාවෙන්. සිංහල භාෂාවෙන් ඉදිරිපත් කරන්නේ නැහැ, විෂය නිර්දේශය උගන්වන පටන් ගන්නකොට ගුරුවරුන්ට පුහුණුවක් නැහැ. ගුරු අත්පොතක් නැහැ. ඉංග්‍රීසියෙන් ඉදිරිපත් කරලා තිබුණත් ඒකක දෙකක් පමණයි. සිංහලෙන් ඉදිර්පත් කර තිබුනේම නැහැ. ප්‍රශ්න පත්‍රය සකස් වෙලා විභාගයට යනකොට ඉංග්‍රීසි භාෂාශවන් සම්පූර්ණ විෂය නිර්දේශයම අන්තර්ජාලයට එකතු කර තිබුනා.දෙමළ පරිවර්තනයක් එකතු කර තිබුණා. නමුත් සිංහලෙන් විෂය නිර්දේශය ඉදිරිපත් කරන්නට ආණ්ඩුව අසමත් වෙනවා.
ඒ අනුව සිංහල මාධ්‍යයෙන් ජීව විද්‍යා ප්‍රශ්න පත්‍රයට පිළිතුරු ලිවීම දරුවන්ට දෙමළ හා ඉංග්‍රීසි මාධ්‍යයෙන් පිළිතුරු ලියූ දරුවන්ට නැති අසාධාරණයකට මුහුණ පෑමට සිදුවීමේ ප්‍රතිඵලයක් විදිහට සිංහල මාධ්‍යයෙන් විභාගයට ලියූ අයට වෛද්‍යවරුන් වීමේ අවස්ථාච අහිමි වීමේ අවදානමක් මතුවී තිබෙනවා” යනුවෙනි.
මෙවර උසස් පෙළ විභාගයට ජීව විද්‍යා අංශයෙන් සිංහල මාධ්‍යයෙන් පෙනීසිටි චිත්මි ජාතුංගආරච්චි සිසුවිය මෙම මාධ්‍ය හමුවට එක් වෙමින් පවසා සිටියේ,
"ජීව විද්‍යාවේදී ප්‍රධානම දෙයක් තමයි වාග් මාලාව. සම්පත් පොත අපට ලබාදී තිබුණේ ඉංග්‍රීසි මාධ්‍යයෙන්, එම සම්පත් පොතේ ඉංග්‍රීසියෙන් තියන වචන සිංහලට පවර්තනය කර ගැනීමේදී අපට උගන්වන ගුරුවරුන් ගොඩක් අපහසුතාවට පත් වුණා. එක් ළමයෙකුගේ උත්තරයට වඩා හාත්පසින්ම තවත් ළමයෙකුගේ උත්තරේ වෙනස් වුණා" යනුවෙනි.
ජාතික පාසලක ජීව විද්‍යාල ආචාර්යවරයකු සහ උත්තර පත්‍ර පරීක්ෂකවරයෙකු වන මංජුල විජයරන්න මහතා,
"මෙවර ප්‍රශ්න පත්‍රයේ එක ප්‍රශ්නයක මිනිසාගේ පුරස්ථ ක්‍රන්ති ශ්‍රාවයෙහි ඇති ශුක්‍රාණු පෝෂකය කුමක්ද? කියා අසනවා, අපේ දරුවන් මෙම ප්‍රශ්නයට උත්තර ලියනවා. නමුත් මෙම ප්‍රශ්නයට ලකුණු දුන්නේ නැහැ, හේතුව තමයි සිංහල සමිපත් පොතේ මේකට අදාළ කරුණු ඇතුළත් වෙලා නැහැ. නමුත් ඉතුග්‍රීසි පොතේ තියෙනවා. ඉංග්‍රීසි මාධ්‍ය ළමයා ලියනවා. සිංහල මාධ්‍ය ළමයාට අසාධාරණයක් සිදුවනවා.
දෙගොල්ලන්ටම ලකුණු යම් ප්‍රමාණයක් අඩු වෙනවා. ඒ වගේම කලල පටල පිළිබඳ කෙටි සටහන් ලියන්න කියන එකේදී කලල පටල වර්ග හතරක් තියනවා. ඉන් එකක් තමයි අලින්දය කියන කලල පටලය. සිංහල දරුවන් මේක හොඳට විග්‍රහ කරලා ලියලා තිබුණා. නමුත් මේකට ලකුණු හිම් වුණේ නැහැ. මොකද ඉංග්‍රීසි සහ සිංහල ලකුණු ලබාදීමේ ක්‍රමවෙදයේ මේ ගැන තිබුණත් දෙමළ මාධ්‍යය ලකුණු ලබාදීමේ ක්‍රමවේදයට මෙය ඇතුළත් කර නැති නිසා. මෙවැනි දේවලින් අපේ දරුවන්ට විශාල ප්‍රමාණයක් ලකුණු අඩු වෙනවා.
ඇතැම් බහුවර්ණ ප්‍රශ්නවල තිබෙන වචන ජීව විද්‍යා විෂය නිර්දේශය කිසිම තැනක සදහන් වෙලා නැහැ. ඒ වෙනුවට විෂය නිර්දේශයේ තියෙන්නේ, දරුවන් ඉගෙන ඉගෙන තියෙන්නේ වෙනත් වචනයක්. ඉතින් ළමයි ලොකු අමාරුවක වැටෙනවා. පරණ විෂය නිර්දේශයට අදාළ ප්‍රශ්න පත්‍ර බලද්දි ඒ දරුවන් ඉතාම හොදට ඒවාට උත්තර ලියා තිබුණා. නමුත් අලුත් විෂය නිර්දේශය අනුව උත්තර ලියු ප්‍රශ්න පත්‍ර බලනකොට නිසි පරිදි උත්තර ලියා නැති බව පැහැදිලි වුණා” යැයි පවසා සිටියේය.
නිදර්ශනී වික්‍රමසිංහ
