බැළලිය හදා වඩා ගන්නා නිවස ආසන්නයේ තාප්පයකින් වටකරන ලද වත්තට
මෙම බැළලිය ඇතුළුවීම සම්බන්ධයෙන් උරණ වී මෙම ක්‍රියාව සිදුකර ඇති බව බැළලිය ඇති දැඩි කරන කාන්තාව පොලිසියට කරන ලද පැමිණිල්ලේ සඳහන් වේ. එම කාන්තාව රෙදි වැනිම සඳහා වැල අසලට පැමිණිමේදී මෙම බැළලිය තාප්පය උඩ සිටිනු දුටු බවත් බැළලියට කතා කළ බවත් මඳ වේලාවකින් ඇය නිවස තුළට ගොස් යළි පිටතට පැමිණිමේදි එම නිවසේ සිටින 17 හැවිරිදි පාසල් සිසුවෙකු කොලයකින් ඔතා යමක් නිවස ආසන්නයේ මාර්ගයේ දමා යෑමෙන් පසු සිදුකළ පරීක්ෂාවේදී පිට කොන්දේ දරුණු කැපුම් තුවාලයක් සහිතව තම නිවෙසේ ඇති දැඩි කළ බැළලිය වේදනාවෙන් කෑමොර දෙමින් සිට විනාඩි දහයකට පමණ පසු මියගිය බවත් එම කාන්තාව කරන ලද පැමිණිල්ලේ සඳහන් වේ. මියගිය බැළලියට කිරි බොන පැටවකු ද සිටින බව පැමිණිල්ලේ වැඩිදුරටත් සඳහන් විය.
බැළලිය ඇතිදැඩි කළ කාන්තාව විසින් පොලීසියට කරන ලද පැමිණිල්ලකට අනුව ක්‍රියාත්මක වූ බණ්ඩාරගම පොලීසියේ වැඩබලන ස්ථානාධිපති ප්‍රධාන පොලිස් පරික්‍ෂක කේ.එස්. දර්ශන මහතා මෙම ක්‍රියාව සිදුකළ බවට පැවසෙන සැකකාර පාසල් සිසුවා අත්අඩංගුවට ගන්න අධිකරණයට ඉදිරිපත් කරන ලෙස අධිකරණ කටයුතු භාරව කටයුතු කරන පොලිස් සැරයන් එදිරිසිංහ මහතා උපදෙස් ලබාදී තිබිණි.
ඒ අනුව වහා ක්‍රියාත්මක වූ සැරයන්වරයා පෙර්දා (18දා) පෙරවරුවේ පැමිණිලිකාර කාන්තාවට දන්වා 119 පොලිස් යතුරුපැදී සංචාරක නිලධාරීන් සමග අවස්ථා දෙකකදී සැකකාර පාසල් සිසුවාට පොලීසියට පැමිණෙන ලෙස දැනුම් දීමට ගොස් තිබුණද නිවසේ දොරවල් වසා ගේට්ටුවටද ඉබි යතුරු දමා තිබෙන බව වැඩබලන ස්ථානාධිපතිවරයා දැනුවත් කර තිබූ බව පොලීසිය පවසයි.
සිද්ධිය සම්බන්ධයෙන් කළුතර දිසාව භාර නියෝජ්‍ය පොලිස්පති විජිත් ගුණරත්න, පානදුර කොට්ඨාස භාර පොලිස් අධිකාරී සංජය ඉරසිංහ, සහකාර පොලිස් අධිකාරී නිශාන්ත සේනාරත්න යන මහත්වරුන්ගේ උපදෙස් මත බණ්ඩාරගම පොලීසියේ වැඩබලන ස්ථානාධිපති ප්‍රධාන පොලිස් පක්‍ෂක කේ.එස්. දර්ශන ඇතුළු නිලධාරීහු පරීක්ෂණ පවත්වති.
බන්ඩාරගම - බිමල් ශ්‍යාමන්
