යුද හමුදාපති ලුතිනන් ජනරාල් ශවේන්ද්‍ර සිල්වා මහතා වැඩබලන ආරක්ෂක මාණ්ඩලික ප්‍රධානී ලෙස පත් කර තිබේ.
ජනාධිපති ගෝඨාභය රාජපක්ෂ මහතා විසින් හෙට(01) දිනයේ සිට ක්‍රියාත්මක වන පරිදි අදාල පත් කිරීම සිදුකර ඇති බව යුද හමුදාව සඳහන් කළේය.
කෙසේ වෙතත් ලුතිනන් ජනරාල් ශවේන්ද්‍ර සිල්වා මහතා තවදුරටත් යුද හමුදාපති ධුරයේ කටයුතු කරනු ලබන බව ද යුද හමුදාව පැවසීය.
ආරක්ෂක මාණ්ඩලික ප්‍රධානී ලෙස කටයුතු කර අද්මිරාල් රවීන්ද්‍ර විජේගුණරත්න මහතා අද එම ධුරයෙන් විශ්‍රාම ගනු ලැබීය.
අද්මිරාල් රවීන්ද්‍ර විජේගුණරත්න මහතා වෙනුවෙන් අද උදෑසන ත්‍රිවිධ හමුදා සම්මාන මුරයක් බණ්ඩාරණායක ජාත්‍යන්තර සම්මන්ත්‍රණ ශාලා පරිශ්‍රය ඉදිරිපිට පැවැත් විය.
මෙම අවස්ථාව සදහා යුධ හමුදාපති ලුතිනන් ජනරාල් ශවේන්ද්‍ර සිල්වා, වයිස් අද්මිරාල් පියල් ද සිල්වා, ගුවන් හමුදාපති එයාර් වයිස් මාර්ෂල් සුමංගල ඩයස් සහ වැඩබලන පොලිස්පති සී.ඩී. වික්‍රමරත්න යන මහත්වරුන් මෙම අවස්ථාව සදහා එක්ව සිටියේය.
අද්මිරාල් රවීන්ද්‍ර විජේගුණරත්න මහතා ශ්‍රී ලංකා ත්‍රිවිධ හමුදාවේ දීර්ඝතම සේවා කාලයක් සපුරන ලද නිලධාරියා ලෙස සැලකෙයි.
