රුකියා විරහිත උපාධිධාරීන් සහ ඩිප්ලෝමාධාරීන් රැකියාගත කිරීමේ වැඩසටහනක් හදුන්වාදෙමින් රජයේ රැකියා 50000 ක් ලබාදෙන බව දක්වා ඊයේ කැබිනට් තීරණ දැනුම් දීමේ අවස්ථාවේදී ඇමති බන්දුල
ගුණවර්ධන විසින් හෙළි කරන්නට යෙදුණ නව රැකියා වැඩසටහනට අධික ඉල්ලුමක් ඇතිව තිබේ.
මේ සදහා අයැදුම් පත්‍රය ජනාධිපති කාර්යාලීය www.presidentsoffice.lk වෙබ් අඩවියෙන් බාගත හැකි බව රජය නිවේදනය කළද ඊයේ සවස සිටම අධික පිවිසුම් නිසා එම වෙබ් අඩවිය 'සර්වර' දෝෂයන්ට ලක්වී අඩපණ විය.
කෙසේ වෙතත් එහි සටහන්වූ අයදුම් පත අපි පහතින් ඉදිරිපත් කරමු.
රැකියා අපේක්ෂකයන් විශ්ව විද්‍යාල ප්‍රතිපදන කොමිෂන් සභාව විසින් පිළිගනු ලබන උපාධි පාඨමාලාවක් හෝ ඩිප්ලෝමා පාඨමාලාවක් හෝ 2019-12-31 වන දිනට සම්පූර්ණ කර තිබිය යුතුය. එදිනට වයස අවුරුදු 35ට නොවැඩි විය යුතුය.
අයැදුම්කරු, අයැදුම්පත ඉදිරිපත් කරනු ලබන ප්‍රාදේශීය ලේකම් කොට්ඨාසයේ ස්ථීර පදිංචිකරුවෙකු සහ පූර්වාසන්න වසර 03 කාල සීමාව තුළ රැකියාවක නිරත නොවූවකු විය යුතුය.
අයැදුම්පත නිසි පරිදි සම්පූර්ණ කර උපාධි සහතිකය හෝ ඩිප්ලෝමා සහතිකය සහ ප්‍රතිඵල ලේඛනයේ ඡායා පිටපතක් (මුල් පිටපත අනුව, සසඳා සාමදාන විනිශ්චයකාරවරයෙකු/නීතිඥයෙකු විසින් සත්‍ය පිටපතක් බව සහතිකර) 2020-02-14 වන දිනට පෙර ශ්‍රී ලංකා තැපැල් දෙපාර්තමේන්තුවේ ස්පීඩ් පෝස්ට් කූරියර් සේවාව මගින් එවිය යුතු බව දක්වා ඇත.
ලිපිනය මෙසේය.
රැකියා විරහිත උපාධිධාරින්/ඩිප්ලෝමාධාරී රැකියාගත කිරීමේ වැඩසටහන 2020, ආයතන කළමනාකරණ සහ සම්බන්ධිකරණ අංශය, ජනාධිපති ලේකම් කාර්යාලය, ගාලු මුවදොර, කොළඹ 01.
ලිපියේ වම් පස ඉහළ කෙළවර, උපාධිධාරියෙකු නම් “උපාධිධාරී /(දිස්ත්‍රික්කයේ නම) යනුවෙන් ද, ඩිප්ලෝමාධාරියෙකු නම් ඩිප්ලෝමාධාරී / (දිස්ත්‍රික්කයේ නම) යන්නද සඳහන් කර තිබිය යුතුය.නියමිත දිනට පසුව ලැබෙන අයැදුම්පත්‍ ප්‍රතික්ෂේප කරන බව දක්වා ඇත.
 තෝරා ගන්නා රැකියාව තමන් කැමති පරිදි ක්ෂෙත්‍ර 11 ක දක්වා ඇත.
ගුරුවරුන් වීමට කැමති නම් අධ්‍යාපන අමාත්‍යාංශය  යටතේ ග්‍රාමීය හා වතු පාසල් අයදුම් කළ යුතු අතර එය තරයේ දක්වා  දුෂ්කර ප්‍රදේශ තෝරාගැනීම  ගැන සහතික කළ අත්සනක් ලබාගනු ඇත.
මීට අමතර රැකියා අවස්ථා වාරිමාර්ග දෙපාර්තමේන්තුව, ගොවිජන සේවා දෙපාර්තමේන්තුව, වනජීවි දෙපාර්තමේන්තුව, දේශීය ආයුර්වේද දෙපාර්තමේන්තුව, සෞඛ්‍ය අමාත්‍යාංශය (ග්‍රාමීය රෝහල්/ඩිස්පෙන්සරි), මිනින්දෝරු දෙපාර්තමේන්තුව, කෘෂිකර්ම දෙපාර්තමේන්තුව, සුළු අපනයන භෝග දෙපාර්තමේන්තුව, තක්සේරු දෙපාර්තමේන්තුව, ආගමන විගමන දෙපාර්තමේන්තුව යන ක්ෂේත්‍රවල සේවා නියුක්ත කෙරේ.
වසරක පුහුණු කාලය තුළ රුපියල් 20,000/ක දිමනාවක් ගෙවනු ලැබේ. දිස්ත්‍රික්ක පදනමින් පත්වීම් කෙරෙන අතර පළමු පත්වීම ලබන දිස්ත්‍රික්කයේ වසර 05ක් සේවය කිරීම අනිවාර්ය වේ.
අයදුම් පත අපි පහතින් ඉදිරිපත් කරමු.