පාර්ලිමේන්තුව නියෝජනය කරන කාන්තා මන්ත්‍රීවරියෝ ප්‍රවෘත්ති සාකච්ඡාවක් පවත්වමින් ප්‍රකාශ කළහ.
මෙම ප්‍රවෘත්ති සාකච්ඡාවට සහභාගී වූ පාර්ලිමේන්තු මන්ත්‍රී සුමේධා ජී. ජයසේන මහත්මිය ප්‍රකාශ කළේ පළාත් පාලන ආයතන, පළාත් සභා සහ පාර්ලිමේන්තු නියෝජනය සඳහා 25%ක කාන්තා නියෝජනයක් දිනාගැනීමට සමත් වුවද එම ප්‍රතිශතය පාර්ලිමේන්තු මැතිවරණයකදී පක්ෂ අපේක්ෂක ලැයිස්තුවලින් හිමි නොවන නිසා පක්ෂ නායකයන් වැඩි කාත්තා අපේක්ෂිකාවන් පිරිසක් මැතිවරණ අපේක්ෂක ලැයිස්තුවලට ඇතුළත් කර ගැනීමට අවධානය යොමු කළ යුතු බවයි.
මෙහිදී පාර්ලිමේන්තු මන්ත්‍රිනී තුසිතා විජේමාන්න මහත්මිය සඳහන් කළේ ලංකාව තුළ අවම විවාහ වයස අවුරුදු 18 බවට පත් කිරීම, ළමා විවාහ වැළැක්වීම, උප්පැන්න සහතිකයේ මවුපියන් විවාහකද යන තීරය ඉවත් කිරීම, දේපළ පැවරීමේදී දියණියන් නොසලකා හැරීම වැළැක්වීම ආදී යෝජනා රැසක් පාර්ලිමේත්තුවට ඉදිරිපත්කිරීමට කාන්තා මන්ත්‍රීවරියන්ට හැකි වූ බවයි.
මේ නිසා දේශපාලනයේ දී කාන්තාවන්ට නිසි තැන නොලැබීම, කාත්තාවන් අවර ගණයෙහිලා සැලකීම මෙන්ම කෙතරම් අධ්‍යාපනයෙන් ඉහළට පැමිණියද ප්‍රතිපත්ති තීරණ ගැනීමේදී කාත්තා දායකත්වය අවම බවත් මේ නිසා පොදුවේ එක් දිස්ත්‍රික්කයකින් එක් මන්ත්‍රිවරියක්වත් තේරී පත්වන අයුරින් හෝ කාන්තා නියෝජනයක් ඊළඟ මැතිවරණය සඳහා ලබා දෙන ලෙස මන්ත්‍රිවරියෝ ජනතාවගෙන් ඉල්ලා සිටියහ.
මෙම අවස්ථාවට සුමේධා ජී. ජයසේන, වෛද්‍ය සුදර්ශනී ප්‍රනාන්දුපුල්ලේ, වෛද්‍ය තුසිතා විජේමාන්න, ශ්‍රියානි විජේවික්‍රම, රෝහිණී කුමාරි විජේරත්න, විජේකලා මහේෂ්වරන්, හිරුණිකා ප්‍රේමචන්ද්‍ර යන පාර්ලිමේන්තු මන්ත්‍රිවරියෝ සහභාගි වූහ.
-ජේ.ටී.ද සිල්වා-
