ඇඳිරි නීති බලපත්‍ර නොමැතිව පාගමනින් මාර්ගයේ ගමන් කල පුද්ගලයන් 4 දෙනෙකුට අයථා අන්දමින් සැළකීම සම්බන්ධයෙන් වැඩ තහනමට ලක්වූ පොලිස් නිළධාරීන් දෙදෙනා යළි සේවයේ පිහිටුවා තිබෙන බව වාර්තාවේ.

බස්නාහිර පළාත භාර උසස් පොලිස් නිළධාරියෙකු සඳහන් කළේ වැඩබලන පොලිස්පතිවරයාගේ උපදෙස් මත ඊයේ රාත්‍රියේදී ඔවුන් දෙදෙනා යළි සේවයේ පිහිටවූ බවයි.

කොළඹ නාගරික රථවාහන කොට්ඨාශයට අනුයුක්ත පොලිස් සැරයන්වරයෙකු සහ කොස්තාපල්වරයෙකු මෙලෙස වැඩ තහනමට ලක්ව තිබුණි. මරදාන ඩාලි පාරේදී පෙරේදා මෙම සිදුවීම වාර්තා වී තිබුණි.
එහිදී අදාළ පොලිස් නිලධාරීන් දෙදෙනා විසින් පදිකයන් 4 දෙනාට ඔවුන්ගේ දෙකන් වලින් අල්ලා කිහිප වතාවක් නැගිට වාඩිවීමට නියෝග කිරීම සම්බන්ධයෙන් ප්‍රසිද්ධියට පත්වූ වීඩියෝ පටයක දර්ශන අනුවයි පොලිසිය මෙම වැඩ තහනම් කිරීම සිදුකර තිබුණි.