රිතික් රෝෂන් හා සුසෑන් ඛාන් සම්බන්ධයෙන් සමාජ මාධ්‍ය ඔස්සේ නවතම පුවතක් ප්‍රචාරය වන්නේ ප්‍රේක්ෂක ජනතාව තුළ කුතුහලයක් උපදවමිනි. නව කොරෝනා වෛරසය හේතුවෙන් දුෂ්කර කාල සීමාවක් පසු කරමින්
සිටින අවස්ථාවක තම හිටපු බිරිඳ සුසෑන් ඛාන් තම පුතුන් සමඟ නැවත නිවසට පැමිණ ඇති බව මාර්තු මාසයේදී රිතික් රෝෂන් සමාජ මාධ්‍ය ඔස්සේ අනාවරණය කර තිබුණි.
රිතික් රෝෂන් විසින් සම-මාපියන් වීමට අවස්ථාව ලබා දීම ගැනත් ඔවුන්ගේ පුතුන්ට සමීප වීමට ඉඩදීම පිලිබඳවත් සුසෑන්ට ස්තූති කර තිබුණි. කෙසේ වෙතත් මොවුන් දෙදෙනා සම මාපියන් ලෙස තම පුතුන්ට උපරිම සාධාරණයක් සිදු කිරීමට උත්සහ දරා ඇති බව පෙනේ. එමෙන්ම සුසෑන් පවසා ඇත්තේ රිතික් සහ ඇය මෙසේ එකම නිවසක සිටීම පුතුන් වෙනුවෙන් ගත් නිවැරදි තීරණයක් යැයි සිතන බවයි. එමෙන්ම සන්සුන්ව එකිනෙකා පිළිබඳව අවබෝධයෙන් යුතුව කටයුතු කිරීමත් මේ අවස්ථාවේ ඉතා වැදගත් වන බව ඇය වැඩිදුරටත් පෙන්වා දී තිබේ.
නිරෝධායන කාලසීමාව තුළ විවිධ ක්‍රියාකාරකම් සිදු කිරීමටද ඔවුන් දෙපළ තීරණය කර ඇත. එමෙන්ම ඔවුන් දෙපලගේ පුතුන් දෙදෙනා එකිනෙකටවෙනස් ආශාවන් ඇති ළමුන් දෙදෙනෙකු වුවත් මේ කාල වකවානුව තුළ ඔවුන් දෙදෙනා එකට එක්ව සහයෝගයෙන් කටයුතු කිරීම විශේෂ අවස්ථාවකි. කෙසේ වෙතත් මෙම පවුල නිරෝධාන කාලසීමාව තුළ පොත් කියවීම කෙරෙහි දැඩි අවධානයක් යොමු කර ඇත්තේ රිතික්ගේ අදහසකට අනුවයි.
ඔවුන් ව්‍යායාම කිරීම සඳහාද නිශ්චිත කාලයක් වෙන් කර ඇති බව සුසෑන් වැඩිදුරටත් පවසයි. මේ අතරතුර ඇය තම හිටපු සැමියා හොඳම පුහුණුකරු ලෙසද හඳුන්වා තිබේ. සෑම දිනකම සවස 6 ට පමණ ව්‍යායාම් වල නිරත වන බවත් මෙය නිරෝගීව සිටීමට පමණක් නොව සතුටින් සිටීමටද ඔවුන්ට බෙහෙවින් ඉවහල් වී ඇති බවත් සුසෑන් වැඩිදුරටත් පවසා තිබේ. මෙම ක්‍රියාකාරකම් වලට අමතරව ගෙවතු වගාව තුළින් ද තමන් මහත් තෘප්තියක් ලබන බව ඈ පවසන්නේ මෙම කාල සීමාව තුළ එවැනි කාර්යයන් සඳහා යොමු වීමේ වැදගත්කමද පැහැදිලි කරමිනි.
(රිෂ්මි ඉෂාරා)
