දිවයිනේපාසල් අද (06දා) ආරම්භ වුවද පාසල් ළමුන් ප්‍රවාහනය කිරීමෙන් තමන් ඉවත්වන බව සමස්ත ලකා අන්තර් පළාත් පාසල් ළමුන් ප්‍රවාහන සේවා සංගමයේ සභාපති රුවන් ප්‍රසාද් මහතා පැවසීය. අම්බලන්ගොඩදී ඊයේ (05දා) පැවැති මාධ්‍ය හමුවකදී හතෙම මෙසේ පවසා සිටියේය.
එහිදී වැඩිදුරටත් අදහස් දැක්වූ ඒ මහතා, "පාසල් පටන් ගත්තත් පාසල් දරුවන් ප්‍රවාහනය කිරීමට අපේ
සංගමයේ කිසිදු බස්රථයක් ධාවනයට එක් කරන්නැහැ. එහෙම බස් රථ ධාවනය කළොත් අපිට ලොකු පාඩුවක් වෙනවා. මොකද පාසල් පටන් ගනේ පහ වසර ශිෂ්‍යත්ව විභාගයට, අධ්‍යයන පොදු සහතික පත්‍ර සාමාන්‍ය පෙළ හා උසස්පෙළ යන විභාගවලට පෙනී සිටින දරුවන් වෙනුවෙන් විතරයි. ඒ දරුවන් වෙනුවෙනුත් වෙලාවල් දෙකකදීයි පාසල පටන් ගනත් අවසන් වෙන්නෙත්. එතකොට එම කාණ්ඩවලට අදාළව අප් බස් රථ වල ගමන් කරන්නේ ඉතාමත් අඩු දරුවන් සංඛ්‍යාවකුයි.
ඒ දරුවන් විතරක් ප්‍රවාහනය කරලා අපිට යන පිරිවැය දරන්න බැහැ. ඒ නිසයි අකමැත්තෙන් මේ තීරණය ගත්තේ.
මේ දරුවන් අපේ බස්රථවලින් ප්‍රවාහනය කරන්න සිදු වෙනවා නම් ක්‍රම දෙකක් අනුගමනය කරන්න අපිට සිද්ධ වෙනවා. එක ක්‍රමයක් තමයි පාසලට නොපැමිණියත් අපේ බස්රථවලින් කලින් පාසල් ගිය සියලුම දරුවන්ගෙන් ගාස්තු අය කිරීම. දෙවැනි එක තමයි යන සීමිත දරුවන්ගෙන් අපිට වැයවෙන පිරිවැය සදහා වෙනදා අය කරන ගාස්තුවට වැඩියෙන් මුදල් අය කිරීම, මේ ක්‍රම දෙකම අසාධාරණ නිසා අපේ සංගමය තීරණය කළා සියලුම දරුවන් සඳහා පාසල් විවෘත කරන තෙක් සිය බස්රථවලින් පාසල් ළමුන් ප්‍රවාහනය කිරිමෙන් වැළකී සිටීමට.” යැයිද පවසා සිටියේය.
සමස්ත ලංකා අන්තර් පළාත් පාසල් ළමුන් ප්‍රවාහන සේවා සංගමයේ සංවිධායක රුවන් ප්‍රීති කුමාර මහතාද මෙහිදී අදහස් දැක්වීය.
කරන්දෙණිය - එම්.සුසිල් ප්‍රියත්ත
