නීතිවිරෝධී මත්පැන්, මත්ද්‍රව්‍ය පිළිබඳව සහ දුම්කොළ අපරාධ වැළැක්වීම සඳහා අඛණ්ඩ මෙහෙයුම් සිදු කරන බැවින් ඒ සඳහා මහජනතාවගේ සහාය සුරාබදු දෙපාර්තමේන්තුවට ලබාදිය හැකි බව ශ්‍රී ලංකා සුරාබදු දෙපාර්තමේන්තුව සඳහන් කරයි.
මේ අනුව අදාළ පැමිණිලි 1913 කෙටි දුරකථන අංකයට ලබාදිය හැකි බවත්, මෙම දුරකථන අංකය පැය විසිහතර පුරා ක්‍රියාත්මක වන බවද එම දෙපාර්තමේන්තුව පෙන්වා දෙයි. මීට අමතරව අදාළ තොරතුරු 0112 877882 ෆැක්ස් අංකයට හා oiccrime@excise.gov.lk විද්‍යුත් තැපෑල මහින්ද පැමිණිලි ඉදිරිපත් කළ හැකිය.
පසුගිය ජුලි මාසය තුළදී සිදු කළ වැටලීම් දෙදහස් අටසිය හතළිස් හතරක ප්‍රමාණය තුළින් පුද්ගලයන් දෙදහස් අටසිය තිස්අටක් අත්අඩංගුවට ගෙන ඇති අතර, ඉන් දෙසිය අසූඅටක් කාන්තාවන් බවද සුරාබදු දෙපාර්තමේන්තුව සඳහන් කරයි.
මෙම වැටලීම්වලදී අත්අඩංගුවට ගත් නඩු භාණ්ඩවල මුළු වටිනාකම රුපියල් මිලියන විස්සකට ආසන්න බවත්, මෙම පිරිස් අධිකරණවලට ඉදිරිපත් කිරීමෙන් පසු රුපියල් මිලියන පහළොවකට අධික දඩ මුදලක් රජයට අය කර දී තිබෙන බවද එම දෙපාර්තමේන්තුව සඳහන් කරයි.
(ඉන්දික හේවාවිතාරණ)
