කරුණෑගල නියෝජ්‍ය නගරාධිපති සුමිත් උඩවාසල මහතා විසින් ඉදිරිපත් කරන ලද එම කෙටුම්පතට පක්‍ෂව ඡන්ද 13ක් ද විරුද්ධව ඡන්ද 3ක් ද ලැබීමෙන් පසුව වැඩි ඡන්ද 10කින් ඉදිරිපත් කරන ලද එම කෙටුම්පත සම්මත විය. කුරුණෑගල නගරාධිපති තුෂාර සංජීව විතාරණ මහතා ඊයේ පැවැති මෙම විශේෂ මහා සභා රැස්වීමට සහභාගී නොවූ අතර නියෝජ්‍ය නගරාධිපතිවරයා සහාවේ මුලසුනේ හිඳිමින් එම මුදල් කෙටුම්පත සභාවට ඉදිරිපත් කළේය.
නගරාධිපතිවරයා සමඟ නාගරික කොමසාරිස්, ප්‍රධාන නාගරික ඉංජිනේරුවරයා, වැඩ අධිකාරිවරයා සහ බැකෝ යන්ත්‍ර ක්‍රියාකාරු වෙනුවෙන් ඉදිරිපත් වන නීතිඥයන් සඳහා ගාස්තු වශයෙන් ගෙවිය යුතු රුපියල් 21,80,000.00ක මුදලක් නගර සභාව විසින් ගෙවිය යුතු බව සඳහන් මුදල් කෙටුම්පතක් එසේ සභා සම්මත කර ගැනුණි.
එම යෝජනාවට විරුද්ධව ජනතා විමුක්ති පෙරමුණේ මන්ත්‍රී රනුක සංජය සමඟ හිටපු නගරාධිපති ගාමිණී පෙරමුණගේ සහ එ.ජා.ප. මන්ත්‍රී සුමේධ අරුණශාන්ත මන්ත්‍රීවරු විරුද්ධ වුහ. විපක්‍ෂය නියෝජනය කරන එක්සත් ජාතික පක්‍ෂයේ මන්ත්‍රීවරුන් කණ්ඩායමක් එම කෙටුම්පතට පක්‍ෂව ඡන්දය පාවිච්චි කිරීම විශේෂත්වයකි. පක්ෂ විපක්ෂ මන්ත්‍රීවරුන් සිවුදෙනකු සහාවට පැමිණ සිටියේ නැත.
- පුෂ්පකුමාර ජයරත්න -
