16 හැවිරිදි වියේ පසුවන ලෙනින් නිරෝෂන් ජීවත්වන්නේ ගම්පහ කල්එළිය වැවහේන්වත්ත ප්‍රදේශයේය.
පසුගිය වසරේ සිට අපස්මාරය සඳහා මීරිගම මූලික රෝහලෙන් ප්‍රතිකාර ගන්නා ලෙනින්ට කොවිඩ් – 19 වසංගත හේතුවෙන් නිවසටම ඖෂධ ලැබී තිබුණි.
ඒ අනුව ඔහුට ඖෂධ ලැබී තිබෙන්නේ පසුගිය අප්‍රේල් 06 වන දා ය.
නමුත්, ඒ ඖෂධ පානය කිරීමත් සමග ලෙනින්ගේ පෙනීම නැතිව ගොස් තිබේ.
මව්පියන් පවසන්නේ රෝහලෙන් ලබාදුන් ඖෂධ හා මීට පෙර ලබාදුන් ඖෂධ අතර වෙනසක් පවතින බවය.
සිය පුතණුවන්ගේ පෙනීම ලබාගැනීම සඳහා මව්පියන් නොයෙකුත් ප්‍රතිකාර කළ ද ඒවා මෙතෙක් සාර්ථක වී නැත.
අපස්මාරය සඳහා දරුවාට ප්‍රතිකාර කළ ඔවුන්ට දැන් ඇස් පෙනීම යථා තත්ත්වයට පත්කර ගැනීම සඳහා තවත් පිරිවැයක් දැරීමට සිදුව තිබේ.
දැන් මෙම මව්පියන් සතු එකම බලාපොරොත්තුව, සිය එකම දරුවාගේ දෑස්වලට පෙනීම ලබා ගැනීමය.
මෙවර සාමාන්‍ය පෙළ විභාගයට මුහුණ දීම සඳහා සූදානමින් සිටි ලෙනින්ගේ පාසල් ගමන ද මේ වන විට නැවතී තිබෙන්නේ සිය අනාගත බලාපොරොත්තු ද බිඳ දමමින්.
“හොඳට ඉගෙන ගෙන IT අංශයෙන් ඉස්සරහට යන්න හිටියේ.. මගේ ඇස් දෙක සනීප කරලා දෙන්න.. පිං සිද්ධ වෙනවා..”ලෙනින් අප සමග පැවසීය.
කෙසේවෙතත්, මීරීගම මූලික රෝහලේ වෛද්‍ය අධිකාරී ජයන්ත අභයරත්න මහතා පැවසුවේ විශේෂඥ වෛද්‍යවරුන්ගෙන් සමන්විත කණ්ඩායමක් මගින් මේ සම්බන්ධයෙන් පරීක්ෂණයක් ආරම්භ කර ඇති බවයි.
