එසේම COVID-19 මරණ ගෙවීගිය දිනය තුළ 1,039කින් ඉහළ ගොස් මේ වනවිට සමස්ත මරණ සංඛ්‍යාව 95,542ක් දක්වා ඉහළ ගොස් තිබේ. එය සමස්ත ආසාදනවලින් 1.6%ක අගයකි.
අගෝස්තු අග සිට ලෝකයේ ඉහළම දෛනික ආසාදන වාර්තා කිරීමට පටන් ගත් දා සිට ඉන්දියාව දිනකට නව ආසාදිතයන් 80,000ත් 90,000ත් අතර ප්‍රමාණයක් එක් කරමින් සිටියි.
ඉන්දීය අගමැති නරේන්ද්‍ර මෝදි පෙරේදා (27දා) ජනතාවගෙන් ඉල්ලා සිටියේ තම නිවෙස්වලින් පිටතට යන විට මුඛ ආවරණ පැලඳ සිටින ලෙසය.
"මේ නීති කොරෝනාවට එරෙහි යුද්ධයේ ආයුධයි. සෑම පුරවැසියෙකුගේම ජීවිතය බේරා ගැනීමට ඒවා ප්‍රබල මෙවලම් වෙනවා” යැයි මෝදි සිය මාසික ගුවන් විදුලි ඇමතුමේදී පැවසීය. නව කොරෝනා වෛරසය මුලදී මුම්බායි සහ නවදිල්ලිය ඇතුළු විශාල අගනගරවලට පහර දුන් අතර, එතැන් සිට සෞඛ්‍ය සේවා පද්ධති වහා බිඳෙනසුලු හා දුර්වල ප්‍රාන්ත හා ග්‍රාමීය ප්‍රදේශ කරා ව්‍යාප්ත විය.
දිල්ලියේ සමස්ත ඉන්දීය වෛද්‍ය විද්‍යා ආයතනයේ (AIMS) ප්‍රජා වෛද්‍ය මහාචාර්ය ආනන්ද ක්‍රිෂ්ණන් පැවසුවේ වෛරසය ආසාදනය වන පුද්ගලයන්ට ප්‍රතිකාර කිරීම කෙරෙහි අවධානය යොමු කළ යුතු බවය. "ආසාදනය ප්‍රජාව තුළ විශාල ලෙස පැතිරී තිබෙනවා. අපට කළ හැකි එකම දෙය වන්නේ රෝගී පුද්ගලයන් රැකබලා ගැනීමයි. ඔවුන් වේගයෙන් හඳුනාගෙන ඔවුන්ට වඩා හොඳින් සැලකීමයි. සමාජ දුරස්ථ සම්මතයන් අනුගමනය කළ යුතුයි. ඉන් ඔබ්බට, නිශ්චිත දෙයක් කළ හැකි යැයි මා සිතන්නේ නැහැ." දිල්ලියේ සමහර නිවැසියන් කියා සිටියේ, ඔවුන් පරිස්සමින් ජීවත් වුවද, වසංගතය පිළිබඳ ඔවුන් තුළ පවතින බිය අඩු වී නොමැති බවය. අනාගතය අවිනිශ්චිත බව ඔවුන් කියයි. යමෙකුට පරිස්සම් විය හැක්කේ සියලු සෞඛ්‍යාරක්ෂක විධි අනුගමනය කිරීමෙන් පමණක් බව ඔවුන් වැඩිදුරටත් කියයි.
