ශ්‍රී ලංකාවේ ජනතාවගෙන් 26.5%ක පිරිසක් අධිරුධිර පීඩනයෙන් පෙළෙන බවත්, තමන්ට අධිරුධිර පීඩනය පවතින බව දන්නා පිරිසෙන් 35%ක්ම ඒ සඳහා ලබාදෙන ඖෂධ නිසි ලෙස භාවිත නොකරන බවත්, සෞඛ්‍ය අමාත්‍යාංශයේ බෝ නොවන රෝග ඒකකය සඳහන් කරයි.
තවද 30%ක පිරිසක් තමාට අධිරුධිර පීඩනය ඇති බව නොදන්නා බැවින්, සැප්තැම්බර් 29 වැනිදාට යෙදී තිබෙන ලෝක හදවත් දිනයට සමගාමීව සතියක කාලයක් පුරා අධිරුධිර පීඩනය පිළිබඳව ජනතාව දැනුවත් කිරීම වෙනුවෙන් දිවයින පුරා වැඩසටහන් සංවිධානය කර ඇති බවත්, සෞඛ්‍ය අමාත්‍යාංශයේ බෝ නොවන රෝග ඒකකයේ අධ්‍යක්ෂිකා විශේෂඥ වෛද්‍ය වින්ද්‍යා කුමාරපේළි මහත්මිය පැවසුවාය.
සෞඛ්‍ය ප්‍රවර්ධන කාර්යාංශයේදී ඊයේ (23දා) පැවැති මාධ්‍ය හමුවට එක්වෙමින් අධ්‍යක්ෂවරු මේ බව පැවසූ අතර, 2016 වර්ෂයේ ඇස්තමේන්තුවකට අනුව ලංකාවේ සිදු වන මරණවලින් 83%කටම හේතුව බෝ නොවන රෝගවන බවත් එයින් 1/3කට හේතු වී තිබෙනුයේ රුධිරවාහිනීගත හා හෘදරෝග බවත් ඒ මහත්මිය පැවසුවාය. ඒ පිළිබඳ අදහස් දක්වමින් ඇය මෙලෙස පැවසුවාය.
"ලෝක හදවත් දිනය සැප්තැම්බර් මස 29 වැනිදාට යෙදී තිබෙනවා. එහි ප්‍රධාන අරමුණ වන්නේ ප්‍රධාන රුධිරවාහිනී ආශ්‍රිත රෝග වැළැක්වීම හා පාලනය කිරීම පිළිබඳ ගතහැකි ක්‍රියාමාර්ග ගැන ලෝකවාසීන් දැනුවත් කිරීම. මේ වසරේ තේමාව හදවතින්ම හදවත රකිමු යන්නයි.
බෝ නොවන රෝග ලෙස හෘද හා රුධිර නාලගත රෝග, දියවැඩියාව, පිළිකා, නිධන්ගත ශ්වසන රෝග සහ වකුගඩු රෝග හඳුන්වනු ලබනවා. 2016 වර්ෂයේ ලෝකයේ සිදුවූ මරණවලින් 31%ක් එනම් 1/3 කට හේතු වෙලා තිබෙන්නේ හෘද හා රුධිරවාහිනීගත රෝගයි. එයින් බහුතරය එනම් 85%කට හේතු වෙලා තිබෙන්නේ හෘදයාබාධ හා ආඝාතයයි. මේ සඳහා හේතු වන චර්යා රටාවන් සම්බන්ධ ගැටලු හතරක් මෙරට ජනතාව අතර තිබෙනවා. ඒවා තමයි දුම්කොළ හා දුම්වැටි භාවිතය, මත්පැන් පානය, සෞඛ්‍ය සම්පන්න නොවන ආහාර භාවිතය හා ක්‍රියාශීලී නොවීම යන ඒවා. මේ අවදානම් සාධක මගහරවා ගැනීමෙන් හෘද රෝග පමණක් නොව අනෙක් බෝ නොවන රෝගත් මගහරවා ගත හැකියි.
මේ වසරේ තේමාව යටතේ හෘද රෝග හා රුධිර නාලගත රෝගවලට හේතුවක් වන අධිරුධිර පීඩනය ගැන දැනුවත් කිරීම හා කලින් හඳුනා ගැනීම කෙරෙහි ජනතාව පෙළ ගැස්වීම වෙනුවෙන් ක්‍රියාමාර්ග රැසක් සංවිධානය කරන්නට ජාතික බෝ නොවන රෝග ඒකකය හා හෘද රෝග විශේෂඥ වෛද්‍යවරුන්ගේ සංවිධානය තීරණය කර තිබෙනවා. ඒ අනුව හදවත් දිනය වෙනුවෙන් සැප්තැම්බර් 28 සිට ඔක්තෝබර් 2 දක්වා සතියක කාලයක් විවිධ සැමරුම් සංවිධානය කර තිබෙනවා.”ලෝක හදවත් දිනය වෙනුවෙන් රුධිර පීඩනය පරීක්ෂා කිරීම හා ජනතාව දැනුවත් කිරීම සඳහා ප්‍රධාන දුම්රිය ස්ථාන, මධ්‍යම බස් නැවතුම්පොළවල්. සුපිරි වෙළෙඳසැල් ආදී තෝරාගත් ස්ථානවල රුධිර පීඩනය මැනීමේ කටයුතු සෑම දිස්ත්‍රික්කයකම ක්‍රියාත්මක කිරීමට නියමිතය. ඒ අනුව සැප්තැම්බර් 28,29,30 යන තෙදින තුළ කොළඹ දුම්රිය ස්ථානයේදී දුම්රිය මගීන්ට නොමිලයේ රුධිර පීඩනය මැන ගැනීමට අවස්ථාව උදාකර දීමට නියමිතය. තවද තෝරාගත් සේවා ස්ථානවලදී ද මෙම වැඩසටහන් ක්‍රියාත්මක කිමට නියමිත අතර, ප්‍රාදේශීය රෝහලට පැමිණෙන රෝගීන්ගේ රුධිර පීඩනය මැනගැනීම සඳහා සුවදිවි සායන වෙත යොමු කිරීමටද කටයුතු යොදා ඇත. එසේම දිවයිනේ සියලුම සෞඛ්‍ය සේවකයන්ගේ රුධිර පීඩනය මැනීමටද නියමිතය.
- නදීශානී පතිරණ -
