"මට නම් මේ නව කොරෝනාවට එරෙහිව එනතක් ලබා ගන්නවාට වඩා වැඩි ආරක්ෂාවක් මුඛ ආවරණ හරහා ලැබෙනවා කියන්න පුළුවන්." ඔහු පවසා ඇත. කෙසේ වෙතත් මෙම මුඛ ආවරණ නිසා නව කොරෝනා ආසාදිත පුද්ගලයෙකුගෙන් පිටවන ආසාදිත අංශු කොතරම් දුර ව්‍යාප්ත වීම අවුරනවා දැයි යන්න පිළිබඳව පැහැදිලි කර ගැනීම සඳහා පර්යේෂණ සිදු කිරීම අනිවාර්ය බවත් ඔහු මෙහිදී පවසා තිබේ.
විශේෂයෙන්ම තවමත් නව කොරෝනාවට එරෙහි එන්නත් අත්හදා බැලීමේ මට්ටමේ පැවතීමත්, ඒවායේ සැබෑ සාර්ථකත්වයක් පිළිබඳව මෙතෙක් ඔප්පු වී නොතිබීමත් මෙන්ම, සැලකිය යුතු පිරිසකට තවමත් එම එන්නත ලබාදී නොතිබීමත් යන කාරණා නිසා මේ තත්ත්වය උදාවන බව අධ්‍යක්ෂවරයා මෙහිදී පෙන්වා දෙයි.
මේ අතර රොබට් රෙඩ්ෆීල්ඩ් (CDC) කොංග්‍රස් උපකමිටුව ඉදිරියේ දැක් වූ මෙම අදහස් 'ගැටලුසහගත’ සහ 'අත්වැරදීමක්' බව එරට ජනාධිපති ඩොනල්ඩ් ට්‍රම්ප් සඳහන් කරයි. විශේෂයෙන්ම නව කොරෝනාවට එරෙහි එන්නත ලබන අවුරුද්දේ දෙවැනි කාර්තුව තෙක්ම සාර්ථක නොවෙනු ඇතැයි ඔහු දැක්වූ අදහස ප්‍රතික්ෂේප කරන බව ජනපති ට්‍රම්ප් පවසයි.
"මෙතැනදී වෙලා තියෙන්නේ රෙඩ්ෆීල්ඩ් සෙනෙට් කමිටුව අහපු ප්‍රශ්නය ගැන ඇති කරගත් අනවබෝධයක්. කිසිම විදියකින්වත් එන්නතකට වඩා මුඛ ආවරණ වැදගත් වෙන්නේ නැහැ. මම හිතන්නේ ඔහු මේ කාරණා දෙක ගැනම අනවබෝධයක් ඇති කරගෙනයි තියෙන්නේ.” ට්‍රම්ප් ධවල මන්දිරයේදී මාධ්‍ය වෙත පවසා ඇත.
මෙම තත්ත්වයත් සමග, එම මධ්‍යස්ථානයේ ප්‍රධානියා ලෙස රෙඩ්ෆීල්ඩ්ගේ ක්‍රියාවන් පිළිබඳව සෑහීමකට පත්වන්නේ දැයි මාධ්‍ය ට්‍රම්ප්ගෙන් විමසූ අවස්ථාවේදී ට්‍රම්ප් තමන් ඔහු ගැන තවදුරටත් විශ්වාසය තබා ඇතැයි පවසා තිබේ.
මේ අතර ධවල මන්දිරයේ කාර්ය මණ්ඩල සාමාජිකයෙකු වෙත නව කොරෝනා වෛරසය ආසාදනය වී ඇතැයි ජනපති ට්‍රම්ප් පසුගිය බදාදා මාධ්‍ය හමුවේ පිළිගෙන තිබේ. එහෙත් මෙතෙක් එම පුද්ගලයා කවුරුන්ද යන්න හෙළිදරව් වී නැත. එහිදී ඔහු හේතුවෙන් තවමත් පුළුල් වශයෙන් වෛරසය ව්‍යාප්ත වීමක් සිදුව නැතැයිද ධවල මන්දිරයේ ප්‍රකාශිකාවක ස්ථිරවම පවසා ඇත.
