ඒ අනුව මහනුවර නගර සභාව ජාතික ගොඩනැගිලි පරේයෂණ සංවිධානය සහ අදාළ ඉදිකිරීම්වලට සහය දුන් ඉංජිනේරුවන් නිකුත් කළැයි කියන ලේඛන සියල්ල පරික්ෂා කරන බවද පොලිසිය පවසයි. මේ සම්බන්ධයෙන් මහනුවර මූලස්ථාන පොලිස් ස්ථානාධිපති ප්‍රධාන පොලිස් පරික්ෂක තුසිත හළංගොඩ මහතාගෙන් විමසූ විට ඒ මහතා මෙසේ පැවසීය. මෙම ගොඩනැගිල්ල ඉදිකිරීම සඳහා විශේෂ බලපත්‍ර හා අවසරය දුන් බව පැවසෙන රාජ්‍ය ආයතනවලින් එවැනි ලේඛන දුන්නේ දැයි පරීක්ෂණ සිදු කිරීමට පියවර ගන්නවා. කඩා වැටුණු ගොඩනැගිල්ල හිමිකරු වූ අනුර ලෙව්කේ නමැත්තා පොලිසියට ප්‍රකාශයක් දී තිබෙනවා.
ජීවිත තුනක් හානිවීමේ සිද්ධියට අදාළ කඩා වැටුණු පස් මහල් ගොඩනැගිල්ල ඉදිකිරීමේ දී නිසි නීත්‍යනුකූලව අවසරය හා ලියවිලි නොමැතිව එය ඉදිකර තිබේ නම් ඒ සම්බන්ධව ද කඩා වැටුණු ගොඩනැගිලි හිමිකරුට එරෙහිව අධිකරණයේ නඩු පැවරිමට මහනුවර මූලස්ථාන පොලිසිය වැඩිදුරටත් පියවර ගනිමින් සිටී. කඩාවැටුණු ගොඩනැගිල්ල ඉදිකිරිමට නිකුත් කෙරුණු සියලු ලේඛන සත්‍ය ඒවා දැයි සොයා බැලීමට පොලිසිය විශේෂ නිලධාරීන් කණ්ඩායමක් පත්කර ඇති බව ද මහනුවර මූලස්ථාන පොලිසිය පවසයි. මහනුවර නාගරික කොමසාරිස් චන්දන තෙන්නකෝන් මහතාගෙන් මේ සම්බන්ධව විමසූ අවස්ථාවේ ඔහු මෙසේ පැවසීය.
කඩා වැටුණු ගොඩනැගිල්ල ඉදිකිරිම සඳහා නගර සභාවේ සැලසුම් අංශය ඉඩමේ පුද්ගලයාට අනුමත කර දී තිබෙනවා. ඒ වගේම අනුකූලතා (සී.එෆ්.සී) සහතිකයකුත් නිකුත් කර තිබෙනවා. කෙසේ වෙතත් දැන් මේ සම්බන්ධව නගරාධිපතිතුමාගේ උපදෙස් මත පරික්ෂණයක් පැවැත්වීම සඳහා නිලධාරීන් කණ්ඩායමකුත් පත් කර තිබෙනවා යැයි ද කීය.
ජේ.එ.එල්.ජයසිංහ-
