කොළඹ - කතරගම ප්‍රධාන මාර්ගයේ රන්න කහඳමෝදර හන්දිය ආසන්නයේදී ඊයේ (10දා) යතුරුපැදියක් බස් රථයක ගැටීමෙන් පාසල් ශිෂ්‍යයෙකු ජීවිතක්ෂයට පත්ව 15 හැවිරිදි දැරියක සහ ඔවුන් දෙදෙනාගේ පියා බරපතළ තුවාල ලබා ඇතැයි හුංගම පොලිසිය පවසයි.
මියගොස් ඇත්තේ රන්න යාය 20 වීරෝදාර මාවතේ පදිංචිව සිටි එස්.එච්. ප්‍රභූෂිත උපේන්ද්‍ර (13) නම් පාසල් ශිෂ්‍යයෙකු බව පොලීසිය පවසයි.
මොවුන් ඊයේ (10දා) උදෑසන සිය පියා සමඟ යතුරුපැදියෙන් පාසලට ගමන් කරමින් සිටියදී මෙම අනතුරට ලක්ව තිබිණි. යතුරුපැදිය හුංගම දෙස සිට රන්න දෙසට ගමන් කර ඇති අතර රන්න කහඳමෝදර හන්දිය ආසන්නයේදී පෞද්ගලික බස් රථයක් සහ කුඩා ලොරි රථයක් අතරින් යතුරුපැදිය ගමන් කර තිබේ. එහිදී බස් රථය මගීන් නංවා ගැනීමට නවතා ඇති අතර ඊට පසුපසින් පැමිණි යතුරුපැදිය බස් රථයෙහි ගැටීමෙන් පෙරළී ඇතැයි පොලිස් පරීක්ෂණවලදී හෙළි වී තිබේ. එම අවස්ථාවේදී රන්න දෙස සිට හංගම දෙසට ට්‍රක් රථයක් ගමන් කර ඇති අතර එහි පිටුපස රෝදයට යට වීමෙන් අනතුර සිදුව ඇතැයි පොලිස් පරික්ෂණවලදී අනාවරණය වී තිබිණි. මෙම අනතුරින් බරපතළ තුවාල ලැබූ පියා සහ දරු දෙදෙනා තංගල්ල මූලික රෝහලට ඇතුළත් කිරීමෙන් පසු 13 හැවිරිදි පාසල් සිසුවා ජීවිතක්ෂයට පත්ව තිබිණි.
මේ අතර 15 හැවිරිදි දියණිය තංගල්ල මූලික රෝහලේ දැඩි සත්කාර ඒකකයේ ප්‍රතිකාර ලබන අතර පියා වැඩිදුර ප්‍රතිකාර සඳහා කරාපිටිය ශික්ෂණ රෝහලට මාරු කර යවා තිබිණි.
ට්‍රක් රථය සහ එහි රියැදුරා හුංගම පොලීසිය විසින් අත්අඩංගුවට ගනු ලැබ තිබේ. හුංගම පොලීසියේ ස්ථානාධිපති ප්‍රධාන පොලිස් පරික්ෂක ක්‍රිෂාන්ත ජයසිංහ මහතාගේ උපදෙස් පරිදි එහි රථවාහන අංශ නිලධාරින් අනතුර පිළිබඳ වැඩිදුර පරීක්ෂණ සිදු කරති.
- අනීෂා මානගේ -
