ඇමෙරිකා එක්සත් ජනපදයේ ජනාධිපති ඩොනල්ඩ් ට්‍රම්ප්ගේ නමට පසුගියදා තැපැල් මගින් ලැබුණු පාර්සලයක් තුළ රයිසින් නමැති උග්‍ර විෂ ද්‍රව්‍ය තිබී හමුවුණු බව එරට බුද්ධි අංශ පවසයි. මෙම පාර්සලය අඩංගු පැකේජය ධවල මන්දිරයට යාමට පෙර බුද්ධි අංශ නිලධාරින් විසින් සිදු කළ පරික්ෂාවේදී මෙම විෂ එහි ඇතුළත් බවට හඳුනාගෙන ඇත.
පාර්සලයේ සඳහන් අන්දමට එය තැපැල් කෙරී ඇත්තේ කැනඩාවෙනි. ඒ අනුව එය ධවල මන්දිරය වෙත එවූ පුද්ගලයා පිළිබඳව මේ වනවිට පරීක්ෂණ ආරම්භ කෙරී ඇතැයි බුද්ධි අංශ පවසයි. මෙම රයිසින් නමැති විෂ ද්‍රව්‍ය ඉතා කුඩා ප්‍රමාණයක් වුවද පුද්ගලයෙකු මරණයට පත් කිරීම සඳහා ප්‍රමාණවත් බව සඳහන් වෙයි. එහිදී එය ආඝ්‍රාණය කිරීම හෝ එන්නත් කිරීම හරහා සිරුරට ඇතුළු වෙයි.
ධවල මන්දිරයේ පිළිවෙතට අනුව ඒ වෙත ලැබෙන සියලුම ආකාරයේ තැපැල්පත් සහ පාර්සල් භාරදීමට පෙරාතුව එක් ස්ථානයකදී පරීක්ෂාවට ලක් කෙරෙයි. එහිදී මෙම සැකකටයුතු පාර්සලය සම්බන්ධයෙන් සිදු කළ පරීක්ෂාවන් දෙකකදීම ඒ තුළ රයිසින් ඇති බවට පැහැදිලිවම හඳුනාගෙන තිබේ. මේ පිළිබඳව නිවේදනයක් නිකුත් කර ඇති FBI ආයතනය, "අප සහ අපගේ එක්සත් ජනපද බුද්ධි අංශ සේවාව මෙන්ම එක්සත් ජනපද තැපැල් ආවේක්ෂණ සේවාවේත් හවුල්කාරීත්වයෙන් මේ සැකකටයුතු පාර්සලය සම්බන්ධයෙන් පරීක්ෂණ සිදු කරනවා. මේ මොහොත වනවිට එම පාර්සලය හරහා මහජන ආරක්ෂාවට කිසිඳු තර්ජනයක් සිදුව නැහැ." යනුවෙන් සඳහන් කර සිටියි.
මීට පෙරද මෙම මාරාන්තික රයිසින් විෂ යොදා ගනිමින් එක්සත් ජනපද ජනාධිපතිවරුන් වෙත ලිපි එවූ අවස්ථා කිහිපයක්ම වාර්තා වී තිබේ. 2014 වසරේදී ෂැනොන් රිචර්ඩ්සන් නම් නිළිය විසින් එක්සත් ජනපදයේ හිටපු ජනාධිපති බරැක් ඔබාමා වෙත මෙන්ම නිව්යෝක් නගරාධිපතිව සිටි මයිකල් බ්ලූම්බර්ග් වෙතද මෙවැනි රයිසින් විෂ සහිත තැපැල්පත් එවා තිබුණි. එහිදී සාක්ෂි සහිතව ඇය ඊට වැරදිකාරිය බවට ඔප්පු වූ අතර වසර 19ක සිරදඬුවම් ඇයට නියම වී තිබේ.
