මේ වසරේ ජනවාරි 01 වැනිදා සිට සැප්තැම්බර් 30 වැනිදා දක්වා කාලය තුළදී මී උණ රෝගීන් හයදහස් එකසිය දහඅටක් වාර්තා වී තිබෙන බව වසංගත රෝග විද්‍යා අංශය සඳහන් කරයි.
මෙම කාලය තුළ වැඩිම මී උණ රෝගීන් ප්‍රමාණයක් වාර්තා වී තිබෙන්නේ, රත්නපුර දිස්ත්‍රික්කයෙන් වන අතර, එම ප්‍රමාණය එක්දහස් තුන්සිය හතළිහකි. එසේම කළුතර දිස්ත්‍රික්කයෙන් මී උණ රෝගීන් හත්සිය දහහතරක්, ගාල්ල දිස්ත්‍රික්කයෙන් මී උණ රෝගීන් හයසිය තිස්පහක්, කෑගල්ල දිස්ත්‍රික්කයෙන් හාරසිය හැටඑකක් වාර්ත වී තිබේ.
මීට අමතරව පසුගිය වසරේදී මී උණ රෝගීන් හයදහස් විසිඑකක්, 2018 වසරේදී පන්දහස් දෙසිය පනස්හතක්, 2017 වසරේදී මී උණ රෝගීන් තුන්දහස් හයසියඑකක්, 2016 වසරේදී හාරදහස්පහක්, 2015 වසරේදී හාරදහස් හාරසිය දෙකක්, 2014 වසරේදී තුන්දහස් දෙසියදාහතරක් සහ 2013 වසරේදී හාරදහස් දෙසිය හැත්තෑහයක් වාර්තා විය.
- ඉන්දිකා හේවාවිතාරණ -
