මෙම වැඩසටහන සඳහා පාසල් ක්‍රිකට් සංගමයේ මැදිහත් වීම මත එළඹෙන වසරේ 08 ශ්‍රේණියට ඇතුළත් වන මෙරට සිටින දක්‍ෂතම ක්‍රිකට් ක්‍රීඩකයන් 40 දෙනෙකු තෝරා ගැනීමට නියමිතව ඇති අතර, ඔවුන්ට සූරියවැව ජාතික පාසල තුළ ආරම්භ කිරීමට සැලසුම් කර තිබෙන වෙනම පන්ති කාමරයක් තුළ අධ්‍යාපන කටයුතු සිදුකිරීමට අවස්ථාව සලසා දී ඇත.
මෙම තෝරාගන්නා ක්‍රිකට් ක්‍රීඩකයන් 40 දෙනා සඳහා නේවාසික පහසුකම්, ක්‍රීඩා උපකරණ, සපත්තු, ඇඳුම් ඇතුළු සියලු දේ සඳහා අනුග්‍රහය දැක්වීමට පෞද්ගලික ආයතන මේ වන විටත් ඉදිරිපත් වී ඇත. මේ අතර ඉදිරියේදී රංගිරි දඹුල්ල ජාත්‍යන්තර ක්‍රිකට් ක්‍රීඩාංගණය මූලික කරගමින් දඹුල්ල මධ්‍ය මහා විද්‍යාලය තුළද මෙවැනිම වැඩසටහනක් ආරම්භ කිරීමට ක්‍රීඩා අමාත්‍යාංශය සැලසුම් කර ඇත.
ක්‍රීඩා අමාත්‍ය නාමල් රාජප්පක්‍ෂ මහතාගේ සංකල්පයක් මත මෙම කටයුත්ත සිදුවන අතර, එය ක්‍රිකට් ක්‍රීඩාවට අමතරව මලල ක්‍රීඩා, වොලිබෝල් වැනි මෙරට තෝරාගත් ක්‍රීඩා කිහිපයක් සඳහාද ක්‍රියාත්මක කිරීමට අමාත්‍යවරයා අදහස් කර තිබේ.
ඒ අනුව එක් එක් ක්‍රීඩාවට විශේෂිත වූ ප්‍රදේශ තුළ තෝරාගත් පාසල්හි මෙවැනි වැඩසටහන් සිදුකිරීමට අදහස් කර ඇති අතර, එහි ආරම්භයක් ලෙස මලල ක්‍රීඩාව සඳහා දියගම මහින්ද රාජපක්‍ෂ ක්‍රීඩාංගණය මුලික කරගනිමින් මලල ක්‍රීඩකයන් සඳහා ක්‍රීඩාවත් අධ්‍යාපනයත් පවත්වාගෙන යාම සඳහා හෝමාගම මහින්ද රාජපක්‍ෂ විද්‍යාලය තුළ වැඩසටහනක් ආරම්භ කිරීමට සැලසුම් කර ඇත.
සූරියවැව ක්‍රිකට් පාසල ආරම්භ කිරීම පිළිබඳ සොයාබැලීම සඳහා ක්‍රීඩා අමාත්‍ය නාමල් රාජපක්‍ෂ මහතා සූරියවැව ක්‍රීඩාංගණයේ නිරීක්‍ෂණ චාරිකාවක පෙරේදා (03දා) නිරත විය. එහිදී අමාත්‍යවරයා පවසා සිටියේ, මෙරට සියලුම ක්‍රීඩාංගණ ක්‍රීඩකයන්ට ක්‍රීඩා කළ හැකි ක්‍රීඩාංගණ බවට පත් කරන බවයි. එහිදී තවදුරටත් අදහස් දැක්වූ අමාත්‍යවරයා,
ඒ වගේම ක්‍රිකට් විතරක් නෙමෙයි කබඩි, බීච් වොලිබෝල්, පාපන්දු වැනි ක්‍රීඩාවල 'එල්.පී.එල්.' ක්‍රිකට් තරඟ ආකෘතියේ තරඟ පවත්වන්නත් අපි මේ වනවිට සාකච්ජා කරලා තියෙනවා" යනුවෙන් පැවසීය.
මෙම අවස්ථාවට අධ්‍යාපන අමාත්‍ය ජී.එල්.පීරිස්, ගුවන්තොටුපළ රාජ්‍ය අමාත්‍ය ඩී.වී. චානක, ශ්‍රී ලංකා ක්‍රිකට් ආයතනයේ ප්‍රධාන විධායක නිලධාරී ඈස්ලි ද සිල්වා, දකුණු පළාත් සම්බන්ධීකාරක ප්‍රසන්න ගලප්පත්ති, සූරියවැව ක්‍රීඩාංගණයේ ප්‍රධාන කළමනාකරු මහේෂ් බෝපගේ යන මහත්වරු ඇතුළු පිරිසක් එක් වූහ.
- නුවන් ජයසේකර -
