කොරෝනා වයිරසය ආසාදනය වී ප්‍රතිකාර මධ්‍යස්ථානයක ප්‍රතිකාර ලබා සුවවී මල්වානේ රස්සපාන ප්‍රදේශයේ සිය නිවසට පැමිණි පුද්ගලයකුගේ බිරිදට, දරුවන් තිදෙනාට හා මවට කොරෝනා වයිරසය ආසාදනය වී තිබෙන බවට ඊයේ (25)උදේ වාර්තාවී ඇතැයි බියගම පොලිසිය පවසයි.

එම පවුලේ පස්දෙනා ප්‍රතිකාර මධ්‍යස්ථානයකට යොමු කිරීමට කටයුතු කරන බවද පොලිසිය සඳහන් කරයි.

කොරෝනා ආසාදිතයකු වූ පුද්ගලයාට කොරෝනා වයිරසය ආසාදනය වී
තිබෙන්නේ පෑලියගොඩ මත්ස්‍ය කොරෝනා පොකුරෙන් වන බවත් පොලිසිය කියයි. මේ අනුව මේ වනවිට බියගම පොලිස් බල ප්‍රදේශයේ කොරෝනා වයිරසය ආසාදිතයන් 82ක් හමුවී තිබෙන අතර ඉන් 63 දෙනෙකු පූර්ණ සුවය ලබා සිය නිවෙස්වලට පැමිණ සිටින බවද පොලිසිය කීය.

තවද මේ වනවිට කොරෝනා ආසාදිතයන්ගේ ආශ්‍රිත පුද්ගලයන් 234 දෙනකු සිය නිවෙස්වල ස්වයං නිරෝධානයට ලක් කර තිබෙන අතර පුද්ගලයින් 300 දෙනකු පමණ සාර්ථකව ස්වයං නිරෝධායනය අවසන් කර තිබෙන බවත් පොලිසිය කීය.

මෙහි අධීක්ෂණ කටයුතු බියගම සෞඛ්‍ය වෛද්‍ය නිලධාරී කාර්යාලය සමග බියගම පොලිස් ස්ථානාධිපති ප්‍රධාන පොලිස් පරීක්ෂක ඒ.ජේ.එම්. ආර්. සමරසිංහ, ප්‍රජා පොලිස් ඒකකයේ ස්ථානාධිපති පොලිස් පරීක්ෂක ආර්.එස්. ජයන්ත, පො.කො. පනාවල (61817), මධුශංක (34270), අසංක (60591), තාරුක (26002), ජයවර්ධන (25841) හා සුරේශ් (93663) යන නිලධාරීහු මෙහෙයවති.

- ඩබ්ලිව්.ඩී.එම්. විතානගේ -