බදුරලිය ප්‍රදේශයේ පදිංචිව සිටි දැරියක් පෙරේදා (03දා) රාත්‍රියේදී හදිසියේ මිය ගොස් ඇති අතර, එය කෝවිඩ් මරණයක් දැයි සැක සහිත බව පාලින්ද නුවර සෞඛ්‍ය වෛද්‍ය නිලධාරී වෛද්‍ය නාලක ජයසිංහ මහතා පැවසීය.


මෙසේ මියගොස් ඇත්තේ බදුරලිය, වතුරාන ප්‍රදේශයේ පදිංචි අවුරුදු 01යි මාස 10ක් වයැසැති දැරියකි. මෙදින සවස දැරියට හුස්ම ගැනීමේ අපහසුවක් ඇති වී බදුරලිය රෝහලට ඇතුළත් කළ බවත්, අනතුරුව වැඩිදුර ප්‍රතිකාර සඳහා නාගොඩ රෝහලට ඇතුළත් කිරීමෙන් අනතුරුව එහිදී දැරිය මිය ගොස් ඇති බවත් වෛද්‍ය නාලක ජයසිංහ මහතා පැවසීය.

මෙම දැරිය සහ පවුලේ අය මාසයක පමණ කාලයක් නාගොඩ ප්‍රදේශයේ ඥාති නිවසක පදිංචිව සිට 03 දින බදුරලියට පැමිණ තිබේ.

දැරියගේ පවුලේ හිතවතෙකු පැවසුයේ, දැරිගේ පියා නාගොඩ සිට තම කුඹුරු අස්වැද්දීම සඳහා දින හතරකට පමණ පෙර බදුරලියට පැමිණ ඇති බවයි. ඒ අතර ඇඳිරි නීතිය ක්‍රියාත්මක වූ බැවින් ආපසු නාගොඩ යාමට නොහැකි වී ඇතැයිද, දැරිය ආහාර නොගෙන සාංකා ගතියක් පෙන්නුම් කිරීම නිසා, 03 දින බදුරලිය නිවස වෙත රැගෙන ආ බවද හෙතෙම පැවසීය.

මිය ගිය දැරියගේ ජෛව සාම්පල් ලබාගෙන පී.සී.ආර්. පරීක්ෂණ සඳහා යොමු කර ඇතැයිද එම වාර්තා අනුව ඉදිරි පියවර ගන්නා බවද පාලින්ද නුවර සෞඛ්‍ය වෛද්‍ය නිලධාරීවරයා පැවසීය.

- ප්‍රේමතිලක පෙරමුණ -