නව පාසල් වාරය ආරම්භයේදී දරුවන්ගේ පැමිණීම අවම වීමට හේතුව මාධ්‍ය තුළින් ප්‍රචාරය වූ විවිධ පාර්ශව සිදුකරන පදනම් විරහිත ප්‍රකාශ බව කාන්තා හා ළමා සංවර්ධන, පෙරපාසල් හා ප්‍රාථමික අධ්‍යාපන, පාසල් යටිතල පහසුකම් හා අධ්‍යාපන සේවා රාජ්‍ය අමාත්‍ය පියල් නිශාන්ත ද සිල්වා මහතා පැවසීය.
අමාත්‍යවරයා සඳහන් කර සිටියේ රජය විසින් සෞඛ්‍ය බලධාරීන්ගේ උපදෙස් මත නිසි වැඩපිළිවෙළක් සහිතව කෝවිඩ්-19 අවදානම අවම ප්‍රදේශවල පාසල් ආරම්භ කිරීමට කටයුතු කළ බවයි.
කෙසේ වුවද දේශපාලන අරමුණ පෙරදැඩිව ඇතැම් පාර්ශව විසින් අසත්‍ය ප්‍රචාර පතුරවන බවත්, දෙමාපියන් සහ ගුරුවරුන් එම ප්‍රතිචාර පිළිබඳ අනිසි බියක් ඇති කර නොගත යුතු බවත් පෙන්වා දුන් අමාත්‍යවරයා, පාසල් තුළ සෞඛ්‍ය ආරක්ෂිත බව තහවුරු කිරීමට අවශ්‍ය ප්‍රතිපාදන රජය විසින් ලබාදී ඇති බවද පැවසීය.
මේ සම්බන්ධයෙන් වැඩිදුරටත් අදහස් දැක්වූ රාජ්‍ය අමාත්‍ය පියල් නිශාත්ත ද සිල්වා මහතා,
" පාසල් ආරම්භ කිරීම ප්‍රමාද වීම හරහා දරුවන් ජීවිතයේ වටිනා කාලය විනාශ වීමක් සිදුවිය හැකියි. එහෙම වුණාත් රටක් ලෙස අපට විශාල ගැටලුවලට අනාගතයේ මුහුණ දීමට සිදුවිය හැකියි. කෝවිඩ් වසංගතය අවසන් වූ පසු අධ්‍යාපන කටයුතු ආරම්භ කිරීමට අදහස් කරන්නේ නම් එය අනුවණකමක්. කෝවිඩ් සමඟ ආර්ථිකය සේම අධ්‍යාපනයද ඉදිරියට ගෙනයාම රජයේ වගකීමයි" යැයිද කීය.
- නිදර්ශනී වික්‍රමසිංහ -
0 Comments