දකුණු පළාතේ සිදු වූ ප්‍රථම කෝවිඩ් මරණය අකුරැස්ස සෞඛ්‍ය වෛද්‍ය නිලධාරි කොට්ඨාසයෙන් වාර්තා වන බව දකුණු පළාත් ආණ්ඩුකාර ලේකම් කාර්යාලයේ පිහිටුවා ඇති කෝවිඩ් -19 මෙහෙයුම් මැදිරියේ ප්‍රධාන සම්බන්ධීකරණ නිලධාරී චාමර මහගමගේ මහතා පැවසීය. මෙසේ මිය ගොස් ඇත්තේ අකුරැස්ස, අමලගොඩ පදිංචිව සිටි 70 හැවිරිදි කාත්තාවකි. කෝවිඩ් වෛරසය ආසාදනය වීමෙන් අනතුරුව හෝමාගම මූලික රෝහලේ ප්‍රතිකාර ලබමින් සිටියදී පෙරේදා (28දා) මෙම කාන්තාව මිය ගොස් ඇත.



මේ අතර දකුණු පළාතේ කෝවිඩ් -19 ආසාදිතයන්ගේ සංඛ්‍යාවද මේ වනවිට 266 දක්වා ඉහළ ගොස් ඇත. ඒ අනුව ගාල්ල දිසාවෙන් ආසාදිතයන් 3දෙනෙක්  වාර්තා වී ඇති අතර, මාතර දිසාවෙන් ආසාදිතයන් 9දෙනෙක් වාර්තා වී තිබේ.  මෙම නවදෙනාගෙන් අටදෙනෙක්ම වැලිපිටිය සෞඛ්‍ය වෛද්‍ය නිලධාරි කොට්ඨාසයෙන් වාර්තා වී තිබේ.  මේ අතර දකුණු පළාතේ ආසාදිතයන්ගෙන් 149දෙනෙක් මේ වනවිට සුවය ලබා ඇත. ඒ අනුව ගාල්ල දිසාවෙන් 95දෙනෙක්ද, මාතර දිසාවෙන් 32නෙක්ද, හම්බන්තොට දිසාවෙන් 22නෙක්ද සුවය ලබා ඇතැයි චාමර මහගමගේ මහතා පැවසීය.


මේ වනවිට දකුණු පළාතේ පවුල් 1079ක පුද්ගලයන් 2519දෙනෙක් නිරෝධායනයට යොමු කර ඇති බවද වාර්තාවේ.  එමෙන්ම දකුණු පළාතේ පුද්ගලයන් 31438දෙනෙක් සඳහා පී. සී. ආර්. පරීක්ෂණ සිදුකොට තිබේ. මේ අතර නිවාසවල නිරෝධායනය වෙමින් සිටින පවුල්වලට සහනයක් ලෙස රජයෙන් රුපියල් 10000ක් වටිනා බඩු මල්ලක් ලබාදීමේ වැඩපිළිවෙළ යටතේ දකුණු පළාත්තේ පවුල් 2948ක් සඳහා ඊයේ වනවිට මෙම බඩු මලු බෙදා දී තිබේ.  ඒ අනුව ගාල්ල දිසාවේ පවුල් 2111ක් සහ මාතර දිසාවේ පවුල් 837ක් සඳහා මෙම බඩු මලු බෙදා දුන් බවද චාමර මහගමගේ මහතා වැඩිදුරටත් සඳහන් කළේය.


-රවිඳු දියගහගේ-