නීරෝධයනය අවසන් කර තම නිවස බලා යමින් සිටි අයෙකුගේ මළ සිරුරක් පුත්තලම ආනන්ද මාවතට හැරෙන ස්ථානයේ මහ මග තිබී හමුවී ඇති බව පුත්තලම පොලීසිය කියයි.
මිය ගොස් ඇත්තේ පුත්තලම - කුරුණෑගල පාර අංක 186 සි 01 පදිංචිව සිටි ධර්මලිංගම් වසන්දනාදන් (අවු:55) නම් අයෙකි. ඔහු අබ්දුල් මලික් නමින් ඉස්ලාම් ආගම වෙත ගොස් ඇති බව පසුව හදුනා ගෙන තිබේ.
පුත්තලම පොලීසිය හා සෞඛ්‍ය වෛද්‍ය නිලධාරී කාර්යාලයේ දැනුම් දීම මත ඔහුගේ පවුගේ ඥාතීන් විසින් සිරුර හදුනා ගන්නා ලදී.
මෙම පුද්ගලයා හෙට්ටිපොල ප්‍රදේශයේ ආපන ශාලාවක (හෝටලයක) සේවය කරමින් සිට ඇත.එම හෝටලයට පැමිණ ගිය අයෙකු කොරෝනා ආසාධිතයෙකු බවට තහවුරු වීමෙන් අනතුරුව එහි සේවය කළ සියලුම දෙනා නීරෝධායනයට යොමු කර ඇත.ඔවුන් නීරෝධායනය වී ඇත්තේ සේවය කරමින් සිට ඇති හෝටලය තුළමය.
05 වැනිදා ඔහු තම නීරෝධායනය අවසන් කර නිවස බලා පැමිණ ඇත. නමුත් ඔහු නිවසට ගොස් නැති බව පොලීසිය විසින් කරන ලද විමර්ශනවලදී හෙලිවී තිබේ.ඔහු සම්බන්ධයෙන් සිදු කර ඇති අවසන් පී.සී.ආර්.පරීක්ෂණයේදී අනාවරණය වී ඇත්තේ හෙතෙම කොරෝනා ආසාධිතයෙකු නොවන බවය.
නැවත වරක් ඔහුගේ පී.සී.ආර් පරීක්ෂණ සිදු කර පසුව පශ්චාත් මරණ පරීක්ෂණය පැවැත්වීමට නියමිතව ඇත.
පුත්තලම සෞඛ්‍ය වෛද්‍ය නිලධාරී කාර්යාලය හා පුත්තලම පොලීසිය වැඩිදුර විමර්ශන කටයුතු සිදු කරනු ලබයි.
( එච්. චන්දන )
0 Comments