චීනයේ සිනොවැක් සමාගම මගින් COVID-19 වෛරසයට එරෙහිව නිපදවා ඇති කොරෝනාවැක් (CoronaVac) එන්නත් මිලියන 50ක් මිලදී ගැනීම සඳහා තුර්කිය එම සමාගමත් සමග එකඟතාවක් අත්සන් තබා ඇතැයි තුර්කි සෞඛ්‍ය අමාත්‍ය ෆොහෙරෙටින් කොකා පසුගියදා අනාවරණය කළේය. 



ඔහු සඳහන් කරන
ආකාරයට මෙම එන්නත් ලබන දෙසැම්බර්, ජනවාරි සහ පෙබරවාරි මාසවලදී තුර්කිය වෙත ලැබීමට නියමිතව ඇත. සිනොවැක් සමාගම නිපදවා ඇති මෙම එන්නත තවමත් අත්හදා බැලීමේ මට්ටමේ පවතින්නකි. කෙසේ වෙතත් මෙම එන්නත හරහා ක්ෂණික ප්‍රතිශක්තිකරණ ප්‍රතිචාරයක් ඇති වන බව හඳුනාගෙන ඇත. එහෙත් මෙම එන්නත ලබාගත් පිරිස අතර නිපදවෙන ප්‍රතිදේහ ප්‍රමාණය COVID-19 සුව වූ රෝගීන් අතර පවතින ප්‍රතිදේහ ප්‍රමාණයට වඩා අඩු බව පැවසෙයි.

මෙම කොරෝනාවැක් එන්නතට අමතරව චීනය තුළ කොරෝනා වැළැක්වීම සඳහා තවත් එන්නත් තුනක් අත්හදා බලමින් තිබේ. ඒවාද අත්හදා බැලීමේ අවසන් අදියරේ පවතින බවත්, ඒවායේ බලපෑම් සහගත තත්ත්වය මෙතෙක් නිශ්චිත වී නැති බවත් පැවසෙයි.

මේ සම්බන්ධයෙන්ද අදහස් දක්වා ඇති තුර්කි සෞඛ්‍ය අමාත්‍යවරයා චීනයේ අනෙකුත් එන්නත් නිෂ්පාදන සමාගම් සමගද දැනටමත් සාකච්ඡා කර තිබෙන බවත් පවසා තිබේ.