ලොව පුරා ව්‍යාප්ත වී ඇති කොරෝනා වසංගතය හේතුවෙන් දැඩි අර්බුදයට ලක්ව ඇති ගුවන් සේවා කර්මාන්තය වෙත මේ වසර තුළදී සහ ලබන වසරේදී එක්සත් ජනපද ඩොලර් බිලියන 157ක අලාභයක් සිදුවන බව ජාත්‍යන්තර ගුවන් ප්‍රවාහන සංගමය (IATA) පවසයි.

එසේම අද වනවිට ලොව පුරා ව්‍යාප්ත වෙමින් පවතින නව කොරෝනා දෙවැනි රැල්ල හේතුවෙන් ප්‍රධාන පෙළේ වෙළෙඳපොළ රැසක් බලපෑමට ලක්ව ඇති නිසා ගුවන් සේවා කර්මාන්තයේ ඉදිරි පුරෝකථන සියල්ලමද මේ වනවිට වෙනස් කිරීමට සිදුව තිබෙන බවත් එම සංගමය සඳහන් කරයි.


ජාත්‍යන්තර ගුවන් ප්‍රවාහන සංගමය පසුගිය ජූනි මාසයේදී සිදුකළ පුරෝකථනයට අනුව ඉදිරි වසර දෙකක කාලය සඳහා ගුවන් සේවා කර්මාන්තය ලබන පාඩුව ඇ.ඩො.බිලියන 100ක් ලෙස ගණන් බලා තිබුණි. එහෙත් අද වනවිට එම අලාභය මේ වසර තුළදී පමණක් ඇ.ඩො.බිලියන 118.5ක් වනු ඇතැයි එම සංගමය පවසයි. එසේ 2021 වසරේදී තවත් ඇ.ඩො.බිලියන 38.7ක් පාඩු වනු ඇතැයි ඔවුන් පුරෝකථනය කර තිබේ.  

විශේෂයෙන්ම අද වනවිට ලොව පුරා නව කොරෝනාව වළකන එන්නතක් සම්බන්ධයෙන් වන අදහස පැතිරී යාමත් සමග ලොව පුරා සංචාරක කර්මාන්තය යථාවත්වීමේ බලාපොරොත්තු ඉහළ නැංවී ඇති අතර, එම තත්ත්වයේ ගෝලීය දියුණුව ලබන වසර දක්වා දිවෙනු ඇතැයි පැවසෙයි.

මේ සම්බන්ධයෙන් අදහස් දක්වන ජාත්‍යන්තර ගුවන් ප්‍රවාහන සංගමයේ අධ්‍යක්ෂ ජනරාල් ඇලෙක්සැන්ඩර් ඩි ජුනිඇක්,
"මේ එන්නත නිසා ආර්ථිකය වෙත වඩාත් ධනාත්මක බලපෑමක් ලැබේ. ඒ වුණත් ගුවන් ගමන් යළිත් කැපී පෙනෙන ලෙස යථාවත්වීමක් ලබන වසරේ මැදක් වන තුරුම සිදු නොවේවි.

ජාත්‍යන්තර ගුවන් ප්‍රවාහන සංගමයේ ඇස්තමේන්තුවලට අනුව මේ වසරේදී ලොව පුරා වාර්තා වන ගුවන් මගීන්ගේ සංඛ්‍යාව බිලියන 1.8ක් දක්වා පහත වැටීමට නියමිතව ඇත. 2019 වසරේදී එය බිලියන 4.5ක් විය. කෙසේ වෙතත් මෙම නව තත්ත්වය ලබන වසර වනවිට බිලියන 2.8ක් දක්වා යථාවත් වනු ඇතැයි අපේක්ෂාව වී ඇත. එසේම 2020 වසරේදී ගුවන් මගීන් හරහා ලැබුණු ආදායම ඇ.ඩො.බිලියන 191ක් දක්වා 69%කින් අඩුවීමේ අවස්ථාවක්ද පවතින බව එම සංගමය පවසයි.

කෙසේ වෙතත් මේ වනවිට ගුවන් භාණ්ඩ ප්‍රවාහන කාර්ගෝ සේවා තුළ දියුණුවක් පවතින අතර එහිදී ගාස්තු අය කිරීම ඉහළ යාම ඒවායේ ආදායම් ඉහළ දැමීමට හේතු වී තිබේ. ඒ අනුව මේ වසරේදී මේ දක්වා ගුවන් භාණ්ඩ ප්‍රවාහන සේවා තුළ ගෝලීයව ඇ.ඩො.බිලියන 117.7ක ආදායමක් රැස් කරගෙන ඇති අතර එය පසුගිය වසරට සාපේක්ෂව 15%ක වර්ධනයකි. කෙසේ වෙතත් මෙලෙස ප්‍රවාහනය කෙරුණු භාණ්ඩවල ප‍්‍රමාණය පසුගිය වසරට සාපේක්ෂව ටොන් මිලියන 54.2ක් දක්වා 11.6%ක ප්‍රතිශතයකින් පහත බැස තිබේ.