කොළඹ පෞද්ගලික රෝහලකින් පරීක්‍ෂණයකට භාජනවීම සඳහා පැමිණි පුද්ගලයකු එම රෝහල කළ පී.සී.ආර්. පරීක්‍ෂණයකින් අනතුරුව එම පරීක්‍ෂණ වාර්තාව 'පොසිටිව්' වීම නිසා එම පුද්ගලයා සහ ඔහු සමඟ පැමිණ සිටි 23 හැවිරිදි දියණිය ඇඳිවත පිටින්ම ගිලන් රථයක තබාගෙන ඉරණවිල නිරෝධායන මධ්‍යස්ථානය වෙත මහ රෑ රැගෙන ඒමේ පුවතක් වාර්තා වේ. 

 මොරටුව, කටුබැද්ද පදිංචි චමින්ද ප්‍රනාන්දු නමැති අය සහ ඔහුගේ දියණිය මෙම සිද්ධියට මුහුණපා ඇත.
එන්ජියොග්‍රෑම් පරීක්‍ෂණයක් කර ගැනීම සඳහා ගිය අවස්ථාවේ පීසීආර් පරීක්ෂණයකටද ලක් කළ බවත් එම රෝහලේ කාමරයක් වෙන්කරවා ගත් තමාගෙන් රුපියල් 50,000ක මුදලක් අයකර ගත් බවත් මෙම සිද්ධියෙන් පසුව එදින රාත්‍රි 8.30ට පමණ මුදල් කවුන්ටරයෙන් කතා කර තමාගේ පීසීආර් වාර්තාව 'පොසිටිව්' වී ඇති බව පවසා කවුන්ටරයට පැමිණ ඉතිරි මුදල් ලබාගන්නා ලෙස දැනුම් දුන් බව සිද්ධියට මුහුණ දුන් චමින්ද ප්‍රනාන්දු මහතා පවසයි. අනතුරුව මුදල් ලබා ගැනීමට දියණිය පිටත් කළ පසු ඇයට රුපියල් 20,000කට ආසන්න මුදලක් ආපසු ලබාදී ඉතිරි මුදල් රෝහලේ වියදම් සඳහා කපා ගන්නා බව දැනුම් දුන්නැයි හෙතෙම පැවැසීය. 

 දියණියට හා තමාට රෝහලේ රාත්‍රි ආහාරය ලබාදුන් අතර ඒ සඳහා එක් අයකුගෙන් රුපියල් 600ක මුදලක් අයකර ගත් බවද හෙතෙම පැවැසීය. ගිලන් රථය පැමිණෙන තෙක් එම කාමරයේ රඳවාගෙන සිටි තමා සහ දියණිය රාත්‍රි 10.00ට පමණ ගිලන් රථය පැමිණි පසු එහි කැඳවාගෙන ගොස් ගිලන් රථයෙන් මෙසේ ඉරණවිලට රැගෙන ආ බව පැවැසීය. තමාගේ දියණිය එසේ රැගෙන යනවා නම් ඇයටත් පී.සී.ආර්. පරීක්‍ෂණයක් කර වාර්තාවක් ලබාගන්නා ලෙස ඉල්ලා සිටි අවස්ථාවේ රෝහල් බලධාරීන් එය ප්‍රතික්ෂේප කර දියණියත් තමාත් යන දෙදෙනාම මෙසේ ඉරණවිලට පිටත්කර එවූ බව සඳහන් කළේය. 


 අපි දෙදෙනාම ඇඳිවත පිටින් මෙහි රැගෙන ආ අවස්ථාවේ ඉරණවිල නිරෝධායන මධ්‍යස්ථානයේ නිලධාරීන් දැනුම් දී ඇත්තේ එක් රෝගියකු රැගෙන එන බැවින් තමන්ට දෙදෙනාම භාර ගැනීමට හැකියාවක් නොමැති බවය. රාත්‍රි 1.30ට පමණ මගේ දියණිය භාර නොගෙන ආපසු හරවා නොයවා එම මධ්‍යස්ථානයේ නිලධාරීන් ඇය රඳවාගෙන ඇයට වෙනම ස්ථානයක පහසුකම් සැලසූ බවත් එසේ නොවූයේ නම් මගේ දියණියට බලාපොරොත්තු නොවූ තත්ත්වයකට මුහුණදීමට වන බවත් චමින්ද ප්‍රනාන්දු මහතා පැවැසීය.
පෞද්ගලික රෝහලකින් කොවිඩ් ආසාදිතයකු නිරෝධායන මධ්‍යස්ථානයකට යොමු කරන්නේ නම් ඒ සඳහා සෞඛ්‍ය බලධාරීන්ගේ පූර්ණ අනුමැතිය ලබාගත යුතු අතර මෙම සිද්ධියට මුහුණ පා ඇති දෙදෙනාගෙන් ඉරණවිල නිරෝධායන මධ්‍යස්ථානයට යැවීම සඳහා අවසරය ලබාගෙන ඇත්තේ චමින්ද ප්‍රනාන්දු මහතාට පමණක් බව පවසන රජයේ වෛද්‍ය නිලධාරීන්ගේ සංගමයේ සංස්කාරක වෛද්‍ය හරිත අලුත්ගේ පැවැසුවේ මේ සිද්ධිය දැනගත් වහාම ඉරණවිල වෛද්‍ය අධ්‍යක්‍ෂවරයාගෙන් කරුණු විමසූ බවත් ඔහු සඳහන් කළේ එක් අයකුට පමණක් අවසර ගෙන දෙදෙනකු රැගෙන විත් ඇරලා ගිය බවය. 

තමන්ට දින 14ක්ම එකම ඇඳුමක් පමණක් ඇඳගෙන රෝහලේ සිටින්නට වූ බවද ඒ මහතා පවසයි. රාත්‍රි 1.30ට පමණ 24 වියැති තරුණියක මෙසේ ආපසු හරවා යැවීම සුදුසු නොවන බැවින් ඇය භාරගෙන ආරක්‍ෂිතව රඳවා ගෙන සිටි බවත් ඇය අද පී.සී.ආර්. පරික්‍ෂණයකට භාජන කර එම පරීක්‍ෂණ ප්‍රතිඵල නෙගටිව් වුවහොත් ඇයට නිවෙසට ගොස් නිරෝධායනය වීමට පහසුකම් සලසන බවත්, අධ්‍යක්‍ෂවරයා තමා සමඟ පැවැසූ බව වෛද්‍ය හරිත අලුත්ගේ පැවැසීය. එසේ වුවද මෙවැනි සිද්ධියක් වාර්තා වූ පළමු අවස්ථාව මෙය බවත් මෙම 24 හැවිරිදි තරුණියට මුහුණ පාන්නට සිදුවූ සිද්ධිය සම්බන්ධයෙන් සෞඛ්‍ය බලධාරීන් වහාම විමර්ශනයක් පවත්වා එම රෝහලට විරුද්ධව නිසි පියවර ගත යුතු බව වෛද්‍ය හරිත අලුත්ගේ මහතා පැවැසීය. 

 ජේ.ටී. ද සිල්වා