COVID-19 වෛරසය වැළැක්වීම සඳහා අනුමැතිය හිමිව ඇති Pfizer එන්නත ඉදිරි සති කිහිපය ඇතුළතදී බ්‍රිතාන්‍යයේ දෙවැනි එළිසබෙත් මහ රැජින වෙතටත් ලබාදීමට නියමිතව ඇති බව එරට ඩේලිමේල් පුවත්පත  වාර්තා කරයි.
මෙහිදී ඇයට අමතරව ස්වාමියා වන පිලිප් කුමරුන්ටත් එම එන්නත ලබාදෙන බව පැවසෙයි. මේ වනවිට දෙදෙනාම පසුවන වයස සම්බන්ධයෙන් පවතින අවදානම මෙලෙස එන්නත් ලබාදීමට හේතු වී තිබේ. එසේම බ්‍රිතාන්‍ය ජනතාව මෙම COVID-19 වළකන එන්නත ලබා ගැනීම සඳහා උනන්දු කරවීමත් මහ රැජිනට සහ ඇගේ ස්වාමියාට මෙලෙස එය එන්නත් කිරීමට තවත් හේතුවක් වී ඇත. දැනටමත් එරට තුළ එන්නත් විරෝධී මතයක් ගොඩනැගෙමින් පවතින බවත්, එය මෙම එන්නතේ සාර්ථකත්වයට බාධාවක් බව බලධාරීන් පවසා සිටියි.

මහ රැජිනට අමතරව රාජකීය පවුලේ තවත් පිරිසකටද මෙම Pfizer එන්නත ලබාදීමට  නියමිතව ඇත. කෙසේ වෙතත් මෙම එන්නත් විදීම සම්බන්ධයෙන් බකිංහැම් මාලිගය මෙතෙක් පැහැදිලිවම ප්‍රකාශයක් නිකුත් කර නැත. එරට තුළ ලබාදෙන මෙම එන්නත් වැඩසටහන යටතේ පළමුව වයස අවුරුදු 80ට වඩා වැඩි ජ්‍යෙෂ්ඨ පුරවැසියන් වෙත මෙන්ම, සෞඛ්‍ය කාර්ය මණ්ඩලය වෙත ලබාදීම සිදුවෙයි.