වීදියබණ්ඩාර කුමාරයාට අයත් මැණික් අඩංගු නිධානයක් ගැනීමට කටයුතු කළ බව කියන සැකකරුවන් හය දෙනෙක් පූජා භාණ්ඩ ඇතුළු උපකරණ සමග කළුතර කොට්ඨාස අපරාධ විමර්ශන ඒකකයේ නිලධාරින් විසින් අත්අඩංගුවට ගනු ලැබූහ.


වීදියබණ්ඩාර කුමාරයාට අයත් මැණික් අඩංගු නිධානයක් තිබෙන බවට ජනප්‍රවාදයක් පවතින බදුරලිය පොලිස් වසමේ හැඩිගල්ල ජනපදයේ පුවක්දොළ රක්ෂිතය හරහා ගලා බසින පුවක් දොලේ දිය බුබුළක් ආසන්නයේ පිහිටි කළු ගලක් පුපුරවා නිධානය ගැනීමට උත්සාහ කිරීමේදී එම පිරිස අත්අඩංගුවට ගෙන ඇත.

මාතර වලස්මුල්ල ප්‍රදේශයේ පදිංචිකරුවන් හතරදෙනෙකුත්, කුලියාපිටිය ප්‍රදේශයේ පදිංචි එක් අයකුත්, බදුරලිය ප්‍රදේශයේ පදිංචි එක් පුද්ගලයකුත් එසේ සැකපිට අත්අඩංගුවට ගෙන ඇත.

පුවක්දොළ ප්‍රදේශයෙන් පසුගිය 23 වැනිදා සවස 5ට පමණ විශාල පිපුරුම් හඬක් ඇසුණු බවට ප්‍රදේශවාසීන්ගෙන් ලැබුණු තොරතුරක් අනුව සිදුකළ වැටලීමකදී එම පිරිස අත්අඩංගුවට ගෙන ඇත.


- බන්දු තඹවිට -