කොළඹ මාදිවෙල මන්ත්‍රී නිල නිවාස සංකීර්ණයේ නිල නිවාස මෙතෙක් බාරදී නැති හිටපු මන්ත්‍රීවරුන්  පස් දෙනකුගේ එම නිවාසවල විදුලිය සහ ජල සැපයුම විසන්ධි කළ බව පාර්ලිමේන්තු නිලධාරීහු පවසති.   
නිල නිවාස මෙතෙක් බාරදී නැති මෙම හිටපු මන්ත්‍රීවරුන්ගෙන් වැඩි දෙනෙක් නැගෙනහිර පළාතේ අය  වෙති.නිල නිවාසවලින් ඉවත් වන ලෙසට පාර්ලිමේන්තු ප්‍රධානීන් අවස්ථා කිහිපයකදී එම මන්ත්‍රීවරුන්ට සිහි කැඳවීම් කර ඇතත් වසරකට වැඩි කාලයක් තිස්සේ ඔවුන් ඉන් ඉවත් නොවීම නිසා ඒ නිවාසවල විදුලිය හා ජල සැපයුම මෙසේ විසන්ධි කළ බව පාර්ලිමේන්තු ප්‍රකාශකයෙක් පැවැසීය.


අලුතින් පත්වුණු මන්ත්‍රීවරුන් දස දෙනකුට පමණ මාදිවෙල මන්ත්‍රී නිල නිවාස සංකීර්ණයෙන් නිවාස ලබාදීමට නියමිතව ඇතැයි ද එම ප්‍රකාශකයා සඳහන් කළේය.  මාදිවෙල මන්ත්‍රී නිල නිවාස සංකීර්ණයෙන් මේ වනවිට නිල නිවාස ලබාගෙන ඇති නවක මන්ත්‍රීවරුන් සංඛ්‍යාව අසූවකට ආසන්න පිරිසක් පසුගිය කාලයේදී මාදිවෙල මන්ත්‍රී නිල නිවාස සංකීර්ණයෙන් ඉවත්ව ගොස් ඇත්තේ සිහි කැඳවීම් ගණනාවක් කිරීමෙන් පසුව යැයි පාර්ලිමේන්තු ආරංචිමාර්ගවලින් පැවැසේ.


-සුජිත් හේවාජුලිගේ-