කොළඹ වරායේ නැගෙනහිර ජැටියේ කළමනාකරණය, මුළු අයිතිය හෝ මුළු අයිතියෙන් කොටසක් විදේශ සමාගමකට පැවරීමට රජය තීරණය කර නොමැති බව අග්‍රාමාත්‍ය මහින්ද රාජපක්ෂ මහතා පැවසීය.
අග්‍රාමාත්‍යවරයා වෙත ප්‍රශ්න යොමු කරන අවස්ථාවේ ඊයේ (06දා) පාර්ලිමේන්තුවේදී ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායක මහතා යොමු කළ ප්‍රශ්නයකට පිළිතුරු ලබාදෙමින් අග්‍රාමාත්‍යවරයා මේ බව සඳහන් කළේය. මේ අතර කොළඹ වරායේ නැගෙනහිර පර්යන්තය ඉන්දීය සමාගමකට 51%ක කොටසක් ලබාදෙන බවට කැබිනට් පත්‍රිකාවක් ඉදිරිපත් කර ඇති බවත්, ඒ අනුව ආයෝජනයට මුවාවී ඉන්දීය සමාගමකට නැගෙනහිර ජැටිය ලබාදීමට කටයුතු කරන්නේද යන්න ආණ්ඩුවෙන් ප්‍රශ්න කරන බවත් එහිදී දිසානායක මහතා පැවසීය.
තමා ඉදිරිපත් කළ අදාළ කැබිනට් පත්‍රිකාව අධ්‍යයනය කිරීම සම්බන්ධයෙන් අමාත්‍ය මණ්ඩල කමිටුවක් මෙන්ම තාක්ෂණික කමිටුවක් පත් කර ඇති බවත්, එම කමිටු වාර්තතා ලැබීමෙන් පසු එය පාර්ලිමේන්තුවට ඉදිරිපත් කරන බවත් එහිදී වරාය හා නාවික අමාත්‍ය රෝහිත අබේගුණවර්ධන මහතා සඳහන් කළේය. එහිදී පාර්ලිමේන්තුවේදී ඇති වූ සංවාදය පහත පරිදි වේ.
ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායක -
"අපනයනය හා ප්‍රතිඅපනයනය කටයුතු වෙනුවෙන් වු බහලුම් ලක්‍ෂ 50ට ආසන්න මෙහෙයුම් කටයුතුවලට කොළඹ වරාය මේ වනවිට දායකත්වය සපයනවා. මෙවැනි අතිශය සුවිශේෂි වටිනාකමක පිහිටි කොළඹ වරායේ නැගෙනහිර ජැටිය දැනටමත් ලංකාවට අහිමි වෙමින් තිබියදී තවත් වැදගත්ම කොටසක් වන නැගෙනහිර ජැටිය තවත් විදේශ සමාගමකට පැවරීමට ආණ්ඩුව සුදානම් වන බව පසුගියදා මාධ්‍ය විසින් සඳහන් කර තිබුණා.
කොළඹ වරාය අපේ රටේ සංවර්ධනයේ උපාය මාර්ගික වශයෙන් වැදගත්ම කේන්ද්‍රයක් බව පිළිගනු ලබන්නේද? පවතින ආණ්ඩුව විසින් කොළඹ වරායේ නැගෙනහිර ජැටිය සම්බන්ධව කවර හෝ ගිවිසුමකට හෝ කවර හෝ පාර්ශ්වයක් සමග එළඹ තිබේද? එසේනම් එම ගිවිසුම් සභාගත කිරීමට කටයුතු කරන්නේද? වත්මන් ආණ්ඩුව නැගෙනහිර ජැටියේ ඉදිරි මෙහෙයුම් සම්බන්ධයෙන් ගනු ලබන තීරණ කවරේද? නැගෙනහිර ජැටියේ කළමනාකරණය හෝ අයිතිය හෝ අයිතියෙන් කොටසක් හෝ විදේශීය සමාගමකට පැවරීමට තීරණය කර තිබේද? එසේනම් එම රට සහ සමාගම කවරේද? මෙම නැගෙනහිර ජැටිය 100%ක් පූර්ණ අයිතිය සහ කළමනාකරණය ශ්‍රී ලංකා වරාය අධිකාරිය පවත්වා ගන්නා බවට සහතිකයක් මේ පාර්ලිමේන්තුවට ලබාදිය හැකිද?"
අග්‍රාමාත්‍ය මහින්ද රාජපක්ෂ -
"2005 වර්ෂයේ සිට 2015 වර්ෂය සඳහා ජනාධිපතිවරයා වශයෙන් කටයුතු කළ සමයේ බහාලුම් ලක්‍ෂ 72ක් පමණ ක්‍රියාත්මක කළ හැකි බහාලුම් අංගණ තුනකින් සමන්විත කොළඹ දකුණු වරාය සංවර්ධන ව්‍යාපෘතිය ක්‍රියාත්මක කරන ලදී. මෙම ව්‍යාපෘති සැලැස්මට අනුව පළමු බහාලුම් මෙහෙයුම් අංගණය (සී.අයි.සීටී) විදිමත් ප්‍රසම්පාදන ක්‍රියාවලියකට යොමු කරමින් රාජ්‍ය සහ පෞද්ගලික හවුල් ව්‍යාපාරයක් ලෙස අවුරුදු 35ක කාලයක් සඳහා ගිවිසුම්ගතව මෙහෙයුම් සිදු කරනු ලැබේ. ඉතිරී බහාලුම් මෙහෙයුම් අංගණ දෙක නැගෙනහිර අංගණය සහ බටහිර බහාලුම් අංගණය කඩිනමින් ක්‍රියාත්මක කිරීම සඳහා වත්මන් රජය විසින් ක්‍රියාමාර්ග ක්‍රියාත්මක කරනු ලබනවා. නැගෙනහිර ජැටියේ කළමනාකරණය හෝ මුළු අයිතිය හෝ මුළු අයිතියෙන් කොටසක් විදේශ සමාගමකට පැවරීමට තීරණට කර නොමැත.
ජාතික ජනබලවේගයේ පාර්ලිමේන්තු මන්ත්‍රී අනුර කුමාරදිසානායක -
“රෝහිත ඇමතිවරයා දාපු කැබිනට් පත්‍රිකාව අනුව 49%ක් වරාය අධිකාරියටත් 51%ක් ඉන්දියානු සමාගමකටක් ලබාදෙන පොරොන්දුව තියෙනවා. මේක පැරණි ගිවිසුම නෙවෙයි. ඒ අනුව මට දැනගන්න තියෙන්නේ වරාය අධිකාරිය සතුව නැගෙනහිර ජැටියේ 100%ක හිමිකාරීත්වය සහ එහි කළමනාකාරිත්වය තබා ගෙනද සංවර්ධනය කරන්නේ? ඒ වගේම මම අගමැතිවරයාගෙන් අහන්නේ වරාය අධිකාරියේ ඉංජිනේරුවන් සහ විධායක නිලධාරින් විසින් හදපු වාර්තාවක් ඉදිරිපත් කරලා තියෙනවා. ඒ වාර්තාවේ ඔවුන් ඉතා හොඳින් පෙන්නුම් කරනවා දැනට වරාය පර්යන්තය මීටර් 400ක් හදලා තියෙනවා. අපට 1,300ක් දක්වා මේක හදන්න අවශ්‍යතාව තියෙනවා. නමුත් තව දෙසීයක් හදා ගත්තොත් මීටර් 300 නැව් දෙකක් මේ පර්යන්තයට ගෙනආ හැකියි. භාණ්ඩාගාරයේ ණය සත පහක්වත් අවශ්‍ය නොවන බව එම විධායක නිලධාරීන් සඳහන් කර තිබෙනවා. ඒ නිසා විශේෂයෙන්ම මා නැවත නැවත අහන්නේ මේ ආයෝජන මුවාවෙන් නැගෙනහිර පර්යන්තයේ 49%ක කොටස එම සමාගමට පවරා දෙනවාද?"
වරාය හා නාවික අමාත්‍ය රෝහිත අබේගුණවර්ධන -
"මහින්ද ජනාධිපතිවරයාගේ පාලන කාලයේ 100%ක්ම කිසිම තැනකට ලබා නොදී කරන්න තමයි සැලසුම තිබුණේ. සැලසුම විනාශ වුණේ ගැළපෙන්නේ නැති ජෝඩු ටිකක් කසාද බැන්දුවා 2015. ඒයහපාලන ආණ්ඩුවෙන් ඒක වුණේ. පර්යන්ත 06ක උරුමයක් ගෝඨාභය ජනාධිපති සහ මහින්ද අගමැතිගේ කාලයේ අපි හදනවා."
- දිනේෂ් සමරකෝන් -
0 Comments