නව පාසල් වාරය ආරම්භ වූ ඊයේ (11) දිනයේ දී ගුරුවරුන්ගේ හා සිසුන්ගේ පැමිණීම හොඳ තත්වයක පැවති බව ලංකා ගුරු සංගමය සඳහන් කරයි. 


කෝවිඩ්-19 තත්ත්වයෙන් ගුරු විදුහල්පතිවරුන් හා ශිෂ්‍ය ශිෂහවන් ආරක්ෂා කර ගැනීමට කඩිනමින් නිසි වැඩපිළිවෙළක් සකස් කර මෙම තත්ත්වය තවදුරටත් වර්ධනය කර ගැනීමට අධ්‍යාපන බලධාරින් කටයුතු කළ යුතු බවද එම සංගමයේ ලේකම් ජෝෂප් ස්ටාලින් මහතා ප්‍රකාශ කළේය.

බස්නාහිර පළාත හා හුදෙකලා ප්‍රදේශ හැර අනෙකුත් ප්‍රදේශවල පාසල්වල කටයුතු ආරම්භ කළ බවත්, මේ අනුව නාගරික ප්‍රදේශවල පාසල්වලට සිසුන් සියයට හතළිහකට ආසන්න ප්‍රමාණයකුත් ග්‍රාමීය ප්‍රදේශවල සියයට හැත්තෑවක පමණ ප්‍රමාණයකුත් සහභාගි වූ බවට වාර්තා වන බවත් ඒ මහතා පවසා සිටියේය.

කෝවිඩ්-19 තත්වය තුළ දරුවන් පාසල් එවීමට දෙමවුපියන් කටයුතු කර තිබෙන නිසා දරුවන් කෝවිඩ්-19 තත්වයෙන් ආරක්ෂා කර ගැනීම අධ්‍යාපන බලධාරින්ගේ වගකීමක් බවද ලේකම්වරයා සඳහන් කළේය.

එහෙත් පාසල්වල සනීපාරක්ෂක කටයුතු සඳහා අවශ්‍ය මුදල් ලබාදීමට අධ්‍යාපන බලධාරීන් කටයුතු කර නොමැති බවත්, මේ නිසා කඩිනමින් අදාළ කටයුතු සඳහා මුදල් ලබාදීමේ වැඩපිළිවෙළක් හා පෙළපොත් හා නිල ඇඳුම් රෙදි ලබාදීමටත් කඩිනමින් වැඩපිළිවෙළක් සකස් කළ යුතු බවත් ජෝෂප් ස්ටාලින් මහතා අවධාරණය කළේය.


- ඉන්දික හේවාවිතාරණ -