ඉන්දියාවෙන් පිරිනැමුණු ඔක්ස්ෆර්ඩ් ඇස්ට්‍රාසෙනෙකා කොවිෂීල්ඩ් එන්නත ඊයේ දිනය තුළ පුද්ගලයින් 5,286 දෙනෙකුට ලබාදී ඇති බව වසංගත රෝග විද්‍යා ඒකකය දන්වා ඇත.  කොළඹ ජාතික රෝහලේදී 1,886 දෙනෙකුට කොවිඩ් මර්දන එන්නත ලබාදී ඇති අතර කොළඹ උතුර ශික්ෂණ රෝහලේදී 803 දෙනෙකුටත්, දකුණු කොළඹ ශික්ෂණ රෝහලේදී 781 දෙනෙකුටත්, යුද හමුදා රෝහලේදී 600 දෙනෙකුටත්,
පනාගොඩ යුද හමුදා කඳවුරේ 400 දෙනෙකුටත්, රිජ්වේ ආර්යා ළමා රෝහලේ 382 දෙනෙකුටත්, හෝමාගම මූලික රෝහලේ 190 දෙනෙකුටත් මුල්ලේරියාව මූලික රෝහලේ 108 දෙනෙකුටත් අයි ඩී එච් රෝහලේදී 80 දෙනෙකුටත් කොවිඩ් මර්දන එන්නත ලබා දී තිබෙයි.
අද දින ශ්‍රී ලංකාවේ කොවිඩ් එන්නත ලබාදීමේ කටයුතු දෙවන දිනටත් ක්‍රියාත්මක වෙයි.
ඊයේ දිනයට වඩා වැඩි පිරිසකට අද දිනයේ එන්නත් ලබාදීමට නියමිත බව නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් පැවසුවේය.

මේ අතර ලෝක සෞඛ්‍ය සංවිධානයේ කොවැක්ස් ආයතනය ලබා දෙන කොවිඩ් එන්නතේ පළමු ප්‍රදානය පෙබරවාරි මස මැද භාගයේ දී ශ්‍රී ලංකාවට ලැබෙන බව එම සංවිධානයේ අධ්‍යක්ෂ ජෙනරාල්වරයාගේ විශේෂ නියෝජිත විශේෂඥ වෛද්‍ය පාලිත අබේකෝන් පවසයි.

එන්නත් ලබා ගැනීම සඳහා ශ්‍රී ලංකාව ලෝක සෞඛ්‍ය සංවිධානයට ඉදිරිපත් කළ සැලසුම සලකා බලා එම සංවිධානය මෙම තීරණයට එළැඹ ඇත. ශ්‍රී ලංකාවේ ජනගහනයෙන් සියයට විස්සකට එන්නත් ලබාදීම සඳහා ලෝක සෞඛ්‍ය සංවිධානය මැදිහත් වන බව විශේෂ නියෝජිතවරයා අවධාරණය කර සිටී. මාස හයක වැනි කාලයක් තුළ එන්නත් වරින් වර ලෝක සෞඛ්‍ය සංවිධානය ලබාදීමට සූදානමින් සිටියි. තවද මෙහි දී ෆයිසර් හෝ ඇන්ට්‍රා සෙනිකා එන්නත ලැබෙනු ඇතැයි විශේෂඥ වෛද්‍ය පාලිත අබේකෝන් විශ්වාසය පළ කළේය.

ශ්‍රී ලංකාවේ කොවිඩ් එන්නත් කරණය පසුගිය ඊයේ (29 වැනිදා) බස්නාහිර පළාතේ රෝහල් 09 කදී සිදු කරන ලදී. එදින සෞඛ්‍ය සේවකයින් 2000කට පමණ එන්නත ලබා දුන් බව සෞඛ්‍ය අමාත්‍යාංශයේ වසංගත රෝග අංශයේ අධ්‍යක්ෂ විශේෂඥ වෛද්‍ය සුදත් සමරවීර කියා සිටියේය. දිවයින පුරා මධ්‍යස්ථාන 4000කදී එන්නත් ලබාදීම අද (30 වැනිදා) ආරම්භ වන අතර එය දින පහකින් අවසන් කිරීමට නියමිතය.


ශ්‍රී ලංකාවේ ජනගහනයේ සියයට 50කට පමණ එන්නත් ලබාදීම කඩිනමින් සිදු කිරීමේ අරමුනින් රාජ්‍ය ඖෂධ නීතිගත සංස්ථාව හරහාද එන්නත් මිලියන දෙකක් මිලදී ගැනීමට රජය තීරණය කර ඇත. එහි දී ෆයිසර් එන්නත ලබා ගැනීමට සැළසුම් කර ඇති බව ප්‍රාථමික සෞඛ්‍ය කොවිඩ් පාලන රාජ්‍ය අමාත්‍යාංශයේ ලේකම් විශේෂඥ වෛදය අමල් හර්ෂ ද සිල්වා පැවැසීය.

තවද රුසියාවේ හා චීනයේ නිෂ්පාදිත එන්නතක් ද ඉදිරි කාලයේ දී ශ්‍රී ලංකාවට ලැබීමට නියමිතය. රුසියාවේ නිෂ්පාදිත එන්නත ශ්‍රී ලංකාවේ නිපදවීම සඳහා යෝජනාවක්ද සෞඛ්‍ය අමාත්‍යාංශයට ලැබී ඇති බව ඔහු අනාවරණ කළේය.

පන්නල හා හොරණ පිහිටි එන්නත් නිෂ්පාදන කර්මාන්ත ශාලා දෙකක දී එම එන්නත නිෂ්පාදනය කළ හැකි බව ඔහු ප්‍රකාශ කරයි. තවද ඒ පිළිබඳව රාජ්‍ය අමාත්‍ය චන්න ජයසුමන රුසියාවේ එන්නත් නිෂ්පාදන සමාගම සමග පසුගිය සතියේ දුරකතන සංවාදයක්ද පවත්වා තිබේ.