චීන එන්නත ලබාගෙන සිටි ඉම්රාන් කාන්ට කොරෝනා

පසුගියදා ශ්‍රී ලංකාවේ සංචාරයකද නිරතවූ පාකිස්තාන අගමැති ඉම්රාන් කාන්ට කොරෝනා ආසාදනයවී තිබෙන බව අද වාර්තා විය.
68 හැවිරිදි ඔහු "නිවසේදී ස්වයං හුදෙකලා" කර ඇති බව එරට ඇමතිවරයෙකු වන ෆයිසාල් සුල්තාන් ට්වීට් කර තිබේ.
2018 අගෝස්තු මාසයේදී අග්‍රාමාත්‍ය ධුරයට පත්වූ ජාතික ක්‍රිකට් කණ්ඩායමේ හිටපු නායකයෙකු වන ඛාන් මහතා චීනයේ නිෂ්පාදිත සීනෝෆාම් එන්නත ලබාගෙන දින දෙකකට පසු මෙලෙස කොරෝනා සඳහා ධනාත්මක වීම විශේෂිතය.

අගනුවර ඉස්ලාමාබාද්හි ආරක්ෂක සමුළුවකට ඇතුළු විශාල පිරිසක් සහභාගී වූ නිත්‍ය රැස්වීම්වලට අග්‍රාමාත්‍යවරයා සහභාගී වී ඇති බව රොයිටර් පුවත් සේවය සඳහන් කරයි.

මුහුණු ආවරණයකින් තොරව එම සමුළුව ඇමතූ ඔහු සිකුරාදා දිළිඳු ජනතාව සඳහා නිවාස ව්‍යාපෘතියක් ආරම්භ කිරීමේ තවත් රැස්වීමකට සහභාගී වූ බවද වාර්තා වෙයි.
පාකිස්තානය මහජනයා සඳහා එන්නත් කිරීම මාර්තු 10 වන දින ආරම්භ කර තිබූ අතර සීනෝෆාම් සමඟ, හදිසි භාවිතය සඳහා කැන්සිනෝබියෝ, ඔක්ස්ෆර්ඩ්-ඇස්ට්‍රාසෙනෙකා සහ ස්පුට්නික් වී එන්නත් රට විසින් අනුමත කර ඇත.
වසංගතය නිසා පාකිස්තානයේ කොරෝනා මරණ 13,799 ක් සහ රෝගීන් 623,135 ක් වාර්තා වී ඇති බව ජෝන්ස් හොප්කින්ස් විශ්ව විද්‍යාලය පවසයි.