වල්පොළ කදුරුගම වැවේ ගිලී මියගොස් සිටි පුද්ගලයකුගේ මළ සිරුරක් පොලිස් හදිසි ඇමතුම් අංශයට ලැබුණු තොරතුරක් මත අලූයම 5.00 ට පමණ සොයාගත් බව රාගම පොලීසිය කියයි. කදුරුගම වැව් බැම්ම මතින් ගමන් ගත් ලොරි රථයක පිරිසක් වැවට වැටී තිබූ යතුරුපැදියක් දැක ඒ පිළිබඳ විපරම් කිරිමේදී වැවේ සිටි පුද්ගලයා දැක පොලීසියට ඒ පිළිබඳව දැනුම් දී ඇත.
එම ස්ථානයට පැමිණි පොලිසිය කළ මූලික විමර්ශනයේදී අදාළ පුද්ගලයා මියගොස් ඇති බවත් ඔහු පැමිණියේ යැයි සැක කරන යතුරුපැදිය එම ස්ථානයේ තිබෙන බවත් තහවුරු කර ගැනීමෙන් පසු එම ස්ථානයට රාගම හදිසි මරණ පරික්ෂක ප්‍රියංකර ලාල් මහතා කැඳවා තිබේ.
හදිසි මරණ පරික්ෂකවරයාගේ විමර්ශනයෙන් පසු මරණය පිළිබඳ මහස්ත්‍රාත් පරික්ෂණයක් පැවැත්විය යුතු බවට නිගමනය කර එය පොලීසියට දන්වා ඇත. අනතුරුව එම ස්ථානයට පැමිණි වැලිසර මහෙස්ත්‍රාත් අධිකරණයේ වැඩ බලන මහෙස්ත්‍රාත් චන්න ගුණවර්ධන මහතා මූලික මහෙස්ත්‍රාත් පරික්ෂණයක් සිදුකර කර මළ සිරුර පිළිබඳව අධිකරණ වෛද්‍ය වාර්තාවක් කැඳවීම සඳහා සිරුර රාගම රෝහලේ අධිකරණ වෛද්‍ය ඒකකය වෙත යොමු කිරිමට පොලීසියට නියෝග කළේය .
මෙලෙස මියගොස් ඇත්තේ දංකොටුව පෞද්ගලික ආයතනයක සේවය කරන අංක 347/බී/1/බී අබේසේකර මාවත, පොල්පිතිමුකලාන, කඳාන ලිපිනයේ පදිංචි ඩබ්ලිව්. ජී.ආර්. ලයනල් ප්‍රේමවංශ (47) නමැති දෙදරු පියකු බව පොලිසිය හඳුනාගෙන ඇත. පශ්චාත් මරණ පරික්ෂණ කටයුතු සඳහා මළ සිරුර රාගම රෝහලේ මෘත ශරිරාගාරයේ තැන්පත් කර ඇති අතර සිද්ධිය සම්බන්ධයෙන් වැඩිදුර විමර්ශන කටයුතු රාගම පොලිසිය විසින් සිදු කරනු ලබයි.
-ප්‍රසංග පෙරේරා-
0 Comments