නුගේගොඩ, නාවල පෞද්ගලික බැංකු ගොඩනැගිල්ලක් තුළදී විදුලි සැර වැදීමෙන් සිසුවෙකු පෙරේදා (22)දා ජීවිතක්ෂයට පත්ව ඇති බව මිරිහාන පොලිසිය පවසයි.මෙලෙස ජීවිතක්ෂයට පත්වූයේ, බොරලැස්ගමුව, නිලම්මහර, ප්‍රදේශයේ පදිංචිව සිටි යසිරු කොළඹගේ (අවු.17) සිසුවාය.
ජීවිතක්ෂයට පත්වූ සිසුවා මහරගම ප්‍රදේශයේ විද්‍යාලයක ඉගෙනුම ලබන බවත්, අධ්‍යාපන පොදු සහතික පත්‍ර සාමාන්‍ය පෙළ විභාගයට පෙනී සිට ප්‍රතිඵල බලාපොරොත්තුව සිටි අයෙකු බවත් පොලීසිය පවසයි.
මියගිය දරුවාගේ පියා නාවල පෞද්ගලික බැංකු ගොඩනැගිල්ලක වායුසමීකරණ අලුත්වැඩියා කටයුත්තක නිරතව සිටියදී ඊට සහාය දැක්වූ සිසුවාට මෙම අනතුර වී ඇති බවත්, විදුලි සැර වැදීමත් සමගම කළුබෝවිල ශික්ෂණ රෝහලට දරුවා ඇතුළත් කිරීමෙන් අනතුරුව ජීවිතක්ෂයට පත්ව ඇති බවත් පරික්ෂණවලදී අනාවරණය විය.මියගිය දරුවාගේ පශ්චාත් මරණ පරික්ෂණය කළුබෝවිල ශික්ෂණ රෝහලේදී සිදු කිරීමට නියමිතව තිබිණි.සිද්ධිය සම්බන්ධයෙන් මිරිහාන මූලස්ථාන ප්‍රධාන පොලිස් පරික්ෂක තුෂාර මංජුල මහතාගේ උපදෙස් මත නිලධාරීහු වැඩිදුර පරීක්ෂණ පවත්වති.
(බණ්ඩාරගම - බිමල් ශ්‍යාමන් ජයසිංහ)
0 Comments