හලාවත-පුත්තලම ප්‍රධාන මාර්ගයේ ආරච්චිකට්ටුව ප්‍රධාන නගරය ආසන්නයේදී පෙරේදා (31)දා පස්වරුවේදි සිදුවූ රිය අනතුරෙන් තුවාල ලබා හය දෙනෙකු හලාවත රෝහලට ඇතුළත් කළ බව ආරච්චිකට්ටුව පොලිසිය පවසයි.තුවාල ලැබූ පිරිසෙන් එක් අයෙකුගේ තත්වය බරපතළ බව රෝහල් ආරංචිමාර්ග කියයි. 

පුත්තලම සිට හලාවත ගමන් කළ වෑන් රථයක් හලාවත සිට පුත්තලම දෙසට ගමන් කළ ත්‍රිරෝද රියක් හා යතුරු පැදියක් මෙලෙස අනතුරට ලක්ව ඇති බව පොලිසිය කියයි. ප්‍රදේශවාසීන්ගේ මැදිහත්වීමෙන් තුවාලකරුවන් රෝහලට ගෙන ගොස් ඇත. වෑන් රථයේ දෙදෙනකු ගමකර ඇති අතර ත්‍රීරෝද රථයේ තිදෙනකු සහ යතුරුපැදියේ දරුවකු ඇතුළු තිදෙනෙකු ගමන් කර ඇති බවද පොලිසිය කියයි.වෑන් රථය මාර්ගයෙන් ඉවතට පැන පෙරළී ගොස් මාර්ගය අසල නවතා තිබූ පාපැදියක ගැටී ඇත.එම අවස්ථාවේදී පාපැදියේ සිටි අඹුසැමි යුවළක් පැන දිවි ගලවාගෙන ඇති බවත් පාපැදිය එම වෑන් රථයට යටවී ඇති බවත් පොලිසිය පවසයි.

 (ආරච්චිකට්ටුව ලලිත් නවරත්න)